ՀՀ պաշտպանության նախարարությունում հունվարի 10-ին ամփոփվել են Զինված ուժերում Մարդու իրավունքների օրվան նվիրված միամսյակի արդյունքները: Այս մասին NEWS.am-ը տեղեկանում է ՀՀ պաշտպանության մամուլի ծառայությունից:
Միջոցառման ընթացքում ՀՀ պաշտպանության նախարար Վիգեն Սարգսյանը, կարեւորելով Զինված ուժերում մարդու իրավունքների պաշտպանության հարցը, շեշտել է, որ պաշտպանական գերատեսչության կարեւորագույն գործառույթներից մեկն էլ քաղաքացիական, ժողովրդավարական վերահսկողությունն է զինված ուժերի նկատմամբ: Նախարարն ընդգծել է պաշտպանական գերատեսչության համագործակցությունը հատկապես Մարդու իրավունքների պաշտպանի գրասենյակի հետ՝ շեշտելով որ համատեղ աշխատանքը տալիս է իր արդյունքը: Վիգեն Սարգսյանը կարեւորել է ՀՀ ՊՆ Մարդու իրավունքների եւ բարեվարքության կենտրոնի աշխատանքը, ինչպես նաեւ Մարդու իրավունքների պաշտպանի գրասենյակին առընթեր զինծառայողների իրավունքների հարցերով փորձագիտական խորհրդի ստեղծումը:
«Մարդու իրավունքների պաշտպանության ոլորտը երկու հատկություն ունի, առաջինը՝ սիստեմատիկ խախտումների միջավայրի փոփոխությունն է, որ կրկնվող խախտումներ չլինեն եւ երկրորդը՝ քաղաքացիական հասարակության եւ մարդու իրավունքների պաշտպանի հետ աշխատելով վճռական ենք՝ ստանալու տեղեկատվություն առանձին դեպքերի մասին եւ հետամուտ լինելու այդ խնդիրների լուծման հարցում: Առաջին շահագրգիռ մարմինը Պաշտպանության նախարարությունն է, որ քաղաքացին Զինված ուժերում իրեն զգա ամուր եւ պաշտպանված, քանի որ միայն այդ դեպքում կարող է արդյունավետ պաշտպանել իր երկիրը»,-նշել է Վիգեն Սարգսյանը:
Մարդու իրավունքների պաշտպան Արման Թաթոյանն էլ, բարձր գնահատելով փորձագիտական խորհրդի դերակատարությունը, շեշտել է, որ ոլորտը յուրահատուկ է եւ պահանջում է մասնագիտական սկզբունքներին համապատասխան աշխատանք:
Հանդիպման ընթացքում ՀՀ ՊՆ Մարդու իրավունքների եւ բարեվարքության կենտրոնի պետ, փոխգնդապետ Ալիկ Ավետիսյանը ներկայացրել է Զինված ուժերում մարդու իրավունքների պաշտպանության ոլորտում իրականացված աշխատանքները, միջազգային կազմակերպությունների եւ քաղաքացիական հասարակության ներկայացուցիչների հետ համագործակցության արդյունքները: