Ադրբեջանոմ Մեծ Բրիտանիայի դեսպան Կերոլ Մերի Քրոֆթսի ու Ադրբեջանի փոխվարչապետ, Փախստականների ու հարկադիր տեղահանվածների հարցերով պետկոմիտեի նախագահ Ալի Հասանովի հանդիպումը մասնավոր էր ու հրապարակման ենթակա չէր։ Այս մասին NEWS.am-ի թղթակցին հայտնել է Հայաստանում Մեծ Բրիտանիայի դեսպան Ջուդիտ Ֆարնուորթը։ Նշենք, որ ադրբեջանական լրատվամիջոցների վարկածով, որոնք տարածել էին պաշտոնական մամուլի հաղորդագրությունը, Ադրբեջանում Մեծ Բրիտանիայի դեսպան Մերի Քրոֆսթը իբրեւ հայտնել էր, որ «Հայաստանը ղարաբաղյան հարցում պահպանում է ստատուս քվոն»։
Հայաստանում Մեծ Բրիտանիայի դեսպանի մեկնաբանության մեջ, մասնավորապես ասվում է․ «Մենք հասկանում ենք, որ դա մասնավոր հանդիպում է եղել։ Կարող ենք հաստատել, որ ղարաբաղյան հակամարտության հարցում Միացյալ Թագավորության քաղաքականության մեջ որեւէ փոփոխություն չի եղել։ Մենք շարունակում ենք վստահ լինել, որ բանակցությունները դեպի երկարատեւ խաղաղություն տանող միակ ուղին են, ու որ ԵԱՀԿ Մինսկի խմբի համանախագահների հովանու ներքո կողմերը պետք է խաղաղ կարգավորման ձգտեն՝ կառուցողական ու ինտենսիվ ճանապարհով, բանակցությունները վերսկելու միջոցով ու վստահության ստեղծմանն ուղղված համաձայնեցված միջոցառումների իրականացումով»։
Այսպիսով, թե ինչ է իրականում Բաքվում ասել բրիտանացի դիվանագետը, մնում է չպարզված։