Անցած տարի, այլ տարիների հետ համեմատած, ապրանքների զգալի թանկացում չի գրանցվել: Այս մասին, այսօր՝ հունվարի 16-ին, լրագրողների հետ հանդիպման ժամանակ նշել է «Հայաստանի սպառողների ազգային ակադեմիայի» փոխնախագահ, մարկետինգի, մոնիտորինգի բաժնի պետ Ռուբեն Հայթյանը:
«Թանկացել է միայն ընդեղենն ու չրեղենը: Եթե ընդեղենի թանկացման պատճառը պարզ է, ապա չրեղենն էլ հո մերն է, պարզապես տնտեսվարողները օգտվում են առիթից: Ըստ օրենքի, եթե գները բարձրանային, ապա հունվարին պետք է իջնեին: Խնդիրը այն է, որ ամեն տեղ տարբեր գներ են՝ խանութներում ավելի թանկ է, քան շուկայում, բայց տատանումներ համարյա չկային: Շուկան չի վերահսկվում», ասաց նա:
Մարկետոլոգի խոսքով՝ պետք է թանկացման դեպքում նախ պատճառը ճշտել, նոր խնդիրը բարձրաձայնել. եթե հումքի գինը բարձրանա, տնտեսվարողը ի՞նչ անի:
«Հենց մի փոքր գների բարձրացում է լինում, վայնասուն ենք բարձրացնում: Շուկայական տնտեսության պայմաններում դա նորմալ երեւույթ է, եթե իհարկե կա գների բարձրացման կարգավիճակ, այսինք հիմնավորված բարձրացում, մասամբ հիմնավորված բարձրացում եւ չհիմնավորված: Եթե հումքի գինը բարձրանում է, ապա տնտեսվարողը ինչ մեղք ունի, հո մինուսով չի՞ աշխատելու»,-նշեց նա:
Խոսելով այս տարվա սկզբին գրանցված գնաճի մասին, Ռուբեն Հայթյանը նկատեց, որ թանկացել են այն ապրանքները, որոնք ներկրվում են եւ դրանց գները մեզնից կախված չեն:
«Անցած տարվա վերջին մենք մոնիթորինգ անցկացրեցինք, եւ ի զարմանս մեզ, գների աճ չի գրանցվել, բացի ընդեղենից եւ ժամանակավոր վաճառք ունեցող այլ մթերքներից: Հունվարի 4-ից հետո շաքարավազի գինը բարձրացավ 10%-ով, որի պատճառը դեռ պարզ չէ,իսկ ներկրվող ալյուրը 3-5%-ով: Ներկրված մրգերը՝ դեկտեմբերի հետ համեմատ, թանկացել են 100-200 դրամով, դրանք հիմնականում ցիտրուսներն են, բանանը եւ այլն»,- ասաց նա:
