ԼՂՀ Սահմանադրության նախագիծը ենթարկվել է մասնագիտական եւ լեզվաբանական փորձաքննության: Այս մասին այսօր՝ դեկտեմբերի 17-ին, Արցախի խորհրդարանի արտահերթ նիստում Արցախի Հանրապետության Սահմանադրության նախագծի քննարկման ժամանակ նշել է Սահմանադրության նախագիծը Ազգային ժողովում ներկայացնելու համար Նախագահի պաշտոնական ներկայացուցիչ, ԼՂՀ արդարադատության նախարար Արարատ Դանիելյանը:
ԼՂՀ նախագահին առընթեր սահմանադրական բարեփոխումների մասնագիտական հանձնաժողովի նախագահ, Ազգային ժողովի ղեկավար Աշոտ Ղուլյանն ամփոփել է քննարկումների ընդմիջումից հետո մասնագիտական հանձնաժողովի կողմից կատարված աշխատանքը եւ նշել, որ մանրամասնորեն քննության են առնվել խմբակցությունների եւ պատգամավորների առաջարկությունները, որոնց արդյունքները հունվարի 13-ին առանձին-առանձին ներկայացվել են առաջարկությունների հեղինակներին:
Արարատ Դանիելյանը նշել է, որ ընդհանուր առմամբ, պատգամավորների կեղմից ներկայացվել է 184 առաջարկություն, որից ընդունվել է 30-ը, 17-ն ամբողջությամբ, 13-ը՝ մասնակի: Չի ընդունվել՝ 154 առաջարկություն, որից 13-ը՝ սահմանադրության հայեցակարգային սկզբունքներին չհամապատասխանելու, 25-ը փոխկապակցված եւ հիմնական առաջարկությանը չհամապատասխանելու հիմնավորմամբ:
ԱԺ նախագահ Ղուլյանն իր խոսքում նշել է. «Այստեղ քաղաքական ուժերի եւ առանձին պատգամավորների մրցապայքար չէ: Մենք բոլորս էլ շահագրգռված ենք, որ մեր երկիրն ունենա ավելի լավ Սահմանադրություն, քանի որ մենք արդեն որոշակի ավանդույթներ ունենք այդ բնագավառում եւ այդ հասունությունը պետք է երեւա հենց 2017թ.-ին Սահմանադրություն ընդունելիս»:
Նիստին ներկա 28 պատգամավորները 20 կողմ, 7 դեմ եւ 1 ձեռնպահ ձայների հարաբերակցությամբ ընդունել են ԼՂՀ ԱԺ-ը որոշումը՝ Արցախի Հանրապետության Սահմանադրության նախագիծը հանրաքվեի դնելու Հանրապետության նախագահի նախաձեռնությանը համաձայնություն տալու մասին: