Երեւանում մարտի 14-ի երեկոյան անչափահասի սպանության գործով դատաքննությունն այսօր` հունվարի 17-ին, Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում մեկնարկել է:
Գործով ամբաստանյալների շահերի պաշտպան Սյուզաննա Խչեյանը միջնորդություն ներկայացրեց ամբաստանյալներ Նարեկ եւ Դավիթ Պետրոսյանների տեսակցությունների արգելանքը վերացնելու մասին: Դատախազը պաշտպանի միջնորդությանը չառարկեց: Դատարանը պաշտպանի ներկայացրած միջնորդությունը մասնակիորեն բավարարեց` վերացնելով ամբաստանյալների մերձավոր հարազատների հետ տեսակցությունների վրա դրված արգելանքը եւ մերժելով ԶԼՄ-ների եւ այլ անձանց հետ տեսակցությունների մասով արգելանքի վերացումը:
Դատական նիստին ներկա չէ տուժող կողմը:
Նարեկ եւ Դավիթ Պետրոսյաններին մեղադրանք է առաջադրվել այն բանի համար, որ նրանք 2016թ. մարտի 13-ին` ժամը 21-ի սահմանում Երեւան քաղաքի Սարի Թաղի 5-րդ փողոցի 67 հասցեում գործող թիվ 47 դպրոցի մոտ վիճաբանության, ապա ծեծկռտուքի ժամանակ իրեն հետ նախապես վերցված «Թիթեռ» տեսակի դանակով կյանքից ապօրինի զրկելու դիտավորությամբ հարվածել են անչափահաս Ա. Բաղդասարյանի սրտին, ինչի հետեւանքով կարճ ժամանակ անց նա մահացել է: Բացի այդ դանակով դիտավորությամբ հարվածներ են հասցրել անչափահաս Սերգեյ Օսիպովին` նրա առողջությանը պատճառել միջին ծանրության վնաս` առողջության տեւական քայքայումով:
Նրանց մեղադրանք է առաջադրվել ՀՀ ՔՕ 3 հոդվածներով՝ 104-րդ հոդվածի 1-ին մասով (սպանություն), 34-104-րդ հոդվածի 2-րդ մասի 1-ին կետով (սպանության փորձ՝ երկու կամ ավելի անձանց նկատմամբ), 113-րդ հոդվածի 2-րդ մասի 1-ին կետով (2 կամ ավելի անձանց միջին ծանրության մարմնական վնաս պատճառելը):
