Արտաքին քաղաքական կողմնորոշումը սկզբունքային հարց է, բայց պետք է նման խնդիրները բանակցության առարկա չդարձնել։ Այս մասին այսօր՝ հունվարի 18-ին, լրագրողների հետ հանդիպման ժամանակ ասաց ԱԻՄ առաջնորդ Պարույր Հայրիկյանը։
Նա ասաց, որ մինչև ընտրությունները ժողովրդավարական դաշինք ստեղծելու համար պետք է մի կողմ դնել տարաձայնությունները եւ բանակցել։«Բոլոր այն հարցերը, որոնք կարող են տարաձայնություն առաջացնել, խետք է անտեսել, չեմ ասում ընդհանրապես մոռանալ։
Նույնիսկ եթե մարտի 1-ի հետ կապված պատասխանատվության հարց կա, մենք ասում ենք՝ այս պահին դա թողնում ենք մի կողմ, ընտրություններից հետո նույն հետեւողականությամբ կքննարկենք եւ պատասխանատվության կենթարկենք»,- ասաց նա։Հայրիկյանը նշեց, որ ժողովրդավարական դաշինքի համար պատրաստ է մի կողմ դնել նաեւ իր արտաքին քաղաքական դիրքորոշումը։
«Եթե ես անգամ Լեւոն Տեր-Պետրոսյանին եմ դիմում, որն ընդգծված ռուսական դիրքորոշում արտահայտեց, ուրեմն պատրաստ եմ արտաքին կողմնորոշման հարցը մի կողմ դնել։ Բայց ասեմ, որ եթե Հայաստանը լինի ժողովրդավարական, անպայման կլինի քաղաքակիրթ աշխարհի կողմը ձգտող պետություն։ Ես հակաամերիկյան էլ կարող եմ լինել, եթե տեսնեմ ամերիկյան իմպերիալիստական դրսեւորում։ Եթե Ռուսաստանը ստիպում է քաղաքացուն տառապել, բնականաբար, դա կլիներ Ռուսաստան, Ճապոնիա թե Թուրքիա, դրա դեմ պետք էր ընդվզել»,- ասաց նա։