Ո՛չ Գագիկ Ծառուկյանի, ո՛չ էլ նրա կուսակիցների համար գաղտնիք չէ, որ նրա վերադարձը տեղի է ունեցել ՀՀԿ համաձայնությամբ։ Այս մասին NEWS.am–ի հետ զրույցում ասաց Կովկասի ինստիտուտի փոխտնօրեն քաղաքագետ Սերգեյ Մինասյանը։
Նրա խոսքով՝ ակնհայտ է, որ լայն բլոկի հիմքում կլինի հենց ԲՀԿ–ն։ «Նրանց հետ մտերիմ քաղաքական գործիչները, որոնք իրենց ժամանակին լքել են կուսակցության շարքերը, պատրաստվում են վերադառնալ։ Դրանք կլինեն մարդիկ, որոնք միջին եւ մեծ բիզնեսն են ներկայացնում եւ դրա հաշվին ուզում են որոշ քաղաքական երաշխիքներ ապահովել իրենց տնտեսական բարգավաճման համար։ Մյուս կողմից դրանք կլինեն առանձին քաղաքական կամ հասարակական գործիչներ կամ փոքր կուսակցություններ, որոնք ի վիճակի չեն ինքնուրույն քաղաքական գործունեություն սկսել»,– ասաց Մինասյանը։
Միակ բանը, որը կմիավորի եւ՛ նրանց, ե՛ւ մյուսներին, եւ՛ Գագիկ Ծառուկյանին, այն է, որ նրանք աշխատելու են այսպես կոչված կառուցողական ընդդիմության դաշտում։ «Այսինքն՝ այն շրջանակներում, որոնք կսահմանվեն նրանց համար ՀՀԿ ղեկավար Սերժ Սարգսյանի կողմից, ում ցանկությամբ եւ համաձայնությամբ Գագիկ Ծառուկյանը վերադարձավ քաղաքական գործունեություն»,– ասաց Սերգեյ Մինասյանը։