«Ելք» դաշինքը ընտրական գործընթաց է մտնում համոզմունքով, որ կարողանալու է ելք գտնել երկրում ստեղծված իրավիճակից։ Այս մասին այսօր՝ հունվարի 21–ին «Ելք» դաշինքի անդրանիկ համաժողովին ասաց «Քաղաքացիական պայմանագիր» կուսակցության անդամ, ազատամարտիկ Սասուն Միքայելյանը։
Նրա խոսքով երկրում գնալով խարխլվում են ժողովրդի ծանր պայքարի գնով ձեռք բերած նվաճումները, ժողովրդավարությունը նահանջում է, տնտեսությունը ծայրահեղ վատ վիճակում է, իսկ պետության յուրաքանչյուր նորածին արդեն պարտք ունի եւ պոտենցիալ պարտապան է, չկա հավատ վաղվա, օրենքի նկատմամբ, չկա արդարության եւ պաշտպանվածության զգացում։
«Այստեղից է գալիս քաղաքական եւ ընտրական գործընթացների նկատմամբ անտարբերությունը, հասարակությունը, որն իշխանության իրական կրողն է, օտարված է իշխանությունից եւ արդյունքում՝ պետությունից։ Տեղի է ունենում գործընթաց, որը կարող է վերածվել ազգային աղետի, հանրությանը սպառնում է լիակատար իրավազրկում, ազգային հարստության գերկենտրոնացում մարդկանց փոքր խմբերի կողմից ամրագրված չակերտավոր օրենսդրությամբ։ Այս ամենի պատճառների եւ հետեւանքների մասին պատկերացումների ընդհանրությունն է, որ հիմք դարձավ «Ելք» դաշինքի ձեւավորման համար»,– ասաց Սասուն Միքայելյանը։
Նրա խոսքով՝ դաշինքում միավորված բոլոր ուժերը մեկ նպատակ ունեն՝ հանրապետությունում մթնոլորտ եւ իրավիճակ փոխել, եւ անհրաժեշտ կոնսենսուսի ձեռք բերման դեպքում պատրաստ են համագործակցել բոլորի հետ։
«Ելք» դաշինքին ներգրավված են «Լուսավոր Հայաստան», «Հանրապետություն» եւ «Քաղաքացիական պայմանագիր» կուսակցությունները:
