Հայաստանի Հանրապետության ժողովուրդը «Ելք» դաշինքի միջոցով հաղթելու իրական հնարավորություն ունի: Այս մասին այսօր՝ հունվարի 21-ին, «Ելք» դաշինքի անդրանիկ համաժողովի ժամանակ ասաց «Քաղաքացիական պայմանագիր» կուսակցության վարչության անդամ Նիկոլ Փաշինյանը:
«Մենք Հայաստանում 100 հազարավոր կողմնակիցներ ունենք, մեր խնդիրն է, որպեսզի մեր ցանակցած քաղաքացու օգնենք, որպեսզի հասկանան՝ չկա ավելի զորեղ ուժ, քան իրենք են, քան իրենց քաղաքական կամքն է, քան իրենց քաղաքական ընտրությունն է: Մենք այստեղ ենք որպես երաշխավոր՝ ի կատար ենք ածելու ՀՀ քաղաքացիների կայացրած որոշումը: Եկել է ժամանակը փակելու խնամի-ծանոթ էջը եւ բացելու քաղաքացիական Հայաստանի էջը, եկել է ժամանակը փակելու խմբապետական Հայաստանի էջը եւ բացելու Հայաստանի էջը, որտեղ ամեն ոք իրեն լիարժեք քաղաքացի է զգում: Մենք պետք է կարողանանք ստեղծել այնպիսի Հայաստան, որտեղ վերադառնում են, ոչ թե փախչում»,-ասաց նա:
Նիկոլ Փաշինյանը նշեց, որ Հայաստանի Հանրապետության քաղաքացին պետք է գիտակցի իր ուժը, իսկ «Ելք» դաշինքի առաքելությունը պետք է լինի քաղաքացուն վստահություն, հավատ ու կամք ներշնչելը. «Կեցցե Հայաստանի Հանրապետությունը, կեցցե «Ելք» դաշինքը, կեցցե գարունը, որ գալու է երկու ամսից՝ ընտրություն, փոփոխություն, հաղթանակ»:
