ՀՀ հատուկ քննչական ծառայությունում քրեական գործ է հարուցվել խուլիգանության մեջ մեղադրվող փաստաբան Վահագն Մ.-ի հաղորդման հիման վրա: Վերջինս հայտնել է, թե ՀՀ քննչական կոմիտեի աշխատակիցներն իրեն հարկադրել են կեղծ ցուցմունքներ տալ եւ կատարել են պաշտոնեական կեղծիք:
ՀՔԾ-ից NEWS.am-ին հայտնում են, որ մասնավորապես, նախաքննության ընթացքում ձեռք բերված տվյալներով` 15.12.2016թ.-ին ՀՀ ՔԿ Արաբկիր վարչական շրջանի քննչական բաժնի պետի տեղակալն ու նույն բաժնի ավագ քննիչը փաստաբան Վահագն Մ.-ին ձերբակալումից ազատելու պայմանով եւ նրա կնոջը քննչական բաժնում պահելու սպառնալիքով հարկադրել են ընդունել փաստաբանի կողմից խուլիգանություն կատարելու հանգամանքը եւ կեղծ ցուցմունքներ տալ:
Բացի այդ, թե՛ Վահագն Մ.-ն եւ թե՛ նրա կինը Հատուկ քննչական ծառայությանը հայտնել են, որ հիշյալ քննչական բաժնի քննիչը կեղծել է փաստաբանի կնոջ` որպես վկայի հարցաքննության արձանագրությունը, այսինքն` առանց վերջինիս ներկայության նրա անունից քրեական գործով ապացույց հանդիսացող փաստաթուղթ է կազմել եւ դրանում ներառել իրականությանը չհամապատասխանող տեղեկություններ:
Այսպիսով, պետական հատուկ ծառայություն իրականացնող առանձին պաշտոնատար անձանց կողմից ցուցմունք տալուն հարկադրելու եւ քրեական գործով ապացույց կեղծելու դեպքերի առթիվ ՀՀ քրեական օրենսգրքի 341-րդ հոդվածի 1-ին մասի եւ 349-րդ հոդվածի 2-րդ մասի հատկանիշներով հարուցվել է քրեական գործ:
Կատարվում է նախաքննություն: