Ռուսաստանում Ադրբեջանի դեսպանատունը հերքում է իր առչությունը «Լիդեր ՏՎ» հեռուստաալիքի լրագրող Անար Հասանովին աշխատանքից հեռացնելու հետ։

minval.az-ի փոխանցմամբ դեսպանատան մամուլի ծառայությունից հայտնել են, որ Անար Հասանովին աշխատանքից հեռացնելու մասին ոչ թե իրենց է պետք հարցնել, այլ Lider TV հեռուստաալիքին։

 «Դեսպանատունը զբաղվում է իր դիվանագիտական գործերով։ Lider TV-ն անկախ հեռուստաալիք է, ինքն է որոշում՝ ում հեռացնի աշխատանքից կամ ընդունի։ Լրագրողի հեռացման կապակցությամբ ավելի լավ է հեռուստաալիքի ղեկավարությանը հարցն ուղղեք»,- ասվում է հայտարարության մեջ։

Լրագրողին հեռացրել էին Լավրովին ուղղված հետեւյալ հարցի համար «ինչ դիրքորոշում կունենա Մոսկվան, եթե օկուպացված տարածքներում հակաահաբեկչական ու օկուպացիոն ուժերից տարածքները մաքրելու գործողություն սկսվի, արդյոք Մոսկվան կփակի աչքերը, թե՞ կմիջամտի Ադրբեջանի ներքին գործերին», որին Ռուսաստանի արտգործնախարարը պատասխանել էր «Դա արդեն Լեռնային Ղարաբաղի հակամարտության հարցում բացառապես Ադրբեջանի ներքին գործերի թեման չէ»։

Պարբերականի աղբյուրների տեղեկություններով, լրագրողին աշխատանքից հեռացնելու պահանջով է հանդես եկել անձամբ Ռուսաստանում Ադրբեջանի դեսպան Պոլադ Բյուլբյուլօղլուն, որը համարում է, որ «լրագրողի հարցը ու դրան Լավրովի պատասխանը վնաս են հասցրել երկրների բարեկամական հարաբերություններին»։