Մեքսիկայի նախագահ Էնրիկե Պենյա Նյետոն խոստացել է ԱՄՆ նոր վարչակազմի հետ երկխոսության ընթացքում պայքարել երկրի ազգային շահերի ու միգրանտների իրավունքների համար: «Լուծումը երկխոսությունն ու բանակցություններն են, այլ ոչ թե առճակատումն ու ենթարկվելը»,- հայտարարել է Նյետոն:
Ըստ BBC-ի՝ նա նաեւ հաղորդել է, որ Մեքսիկան մտադիր է նպաստել ԱՄՆ-ի, Մեքսիկայի եւ Կանադայի միջեւ ազատ առեւտրի մասին Հյուսիսամերիկյան համաձայնագրի պահպանմանը, որն ԱՄՆ նախագահ Դոնալդ Թրամփի քննադատությանն է արժանացել:
«Ակնհայտ է, որ ԱՄՆ-ն արտաքին քաղաքականության նոր տեսլական ունի: Մեքսիկան պետք է պաշտպանի իր ազգային շահերը»,- ասել է Նյետոն:
Նա նաեւ մեկնաբանել է ապօրինի միգրանտներից պաշտպանվելու համար ԱՄՆ-ի եւ Մեքսիկայի սահմանին նոր պատ կառուցելու՝ Թրամփի սպառնալիքները: Սպիտակ տան նոր ղեկավարն ասել էր, որ այն պետք է կառուցվի Մեքսիկայի հաշվին, իսկ հետո խոստացել փոխհատուցել ծախսերը:
Սակայն, ըստ Նյետոյի, Մեքսիկան «չի հավատում պատերին, այլ հավատում է կամուրջներին»: