ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը Մոսկվա կատարած այցի շրջանակներում հանդիպել է ՌԴ կապի եւ զանգվածային հաղորդակցության նախարար Նիկոլայ Նիկիֆորովի հետ։
Կողմերը քննարկել են Եվրասիական տնտեսական միության (ԵՏՄ) շրջանակներում երկու երկրների փոխգործակցության, ինչպես նաեւ կապի եւ տեղեկատվական տեխնոլոգիաների ոլորտում երկկողմ համագործակցության հնարավորությունների հետ կապված մի շարք հարցեր։
Նախարարությունից NEWS.am-ին հայտնում են, որ անդրադառնալով ԵՏՄ շրջանակներում համագործակցությանը՝ Նիկոլայ Նիկիֆորովը նշել է, որ Ռուսաստանի, Հայաստանի եւ ԵՏՄ անդամ մյուս երկրների միջեւ գործակցության կարեւորագույն քայլերից մեկը ԵՏՄ թվայնացման օրակարգի իրականացումն է։ Այն ոչ միայն ԵՏՄ ինտեգրման բաղադրիչն է, այլեւ ԵՏՄ երկրների ներգրավումն է աշխարհի թվային տրանսֆորմացիաների վերափոխման լայնածավալ գործընթացում։
Հանդիպման ընթացքում քննարկվել են նաեւ Հայաստանի եւ Ռուսաստանի միջեւ տեղեկատվական տեխնոլոգիաների (ՏՏ) ոլորտին առնչվող հարցեր։
Վ. Մարտիրոսյանը կարեւորել է Ռուսաստանի առաջատար տեխնիկական բուհերում հայ ուսանողների ներգրավվածությունը, անդրադարձել հայկական եւ ռուսական բջջային կապի օպերատորների, փոստային ծառայությունների ոլորտում արդեն իսկ ծավալված ակտիվ գործակցությանը։ Նա հույս է հայտնել, որ տեղեկատվական տեխնոլոգիաների ոլորտում երկու երկրների միջեւ համագործակցության շրջանակներն առաջիկայում կընդլայնվեն: