2019 թվականին շահագործման կհանձնվեն Հայաստան-Իրան եւ Հայաստան-Վրաստան էլեկտրահաղորդման գծերը: Այս մասին, այսօր՝ հունվարի 25-ին, Արեւային էներգետիկայի ներդրումային համաժողովի բացման ժամանակ իր խոսքում նշել է ՀՀ նախագահ Սերժ Սարգսյանը:
Նրա խոսքով, էներգետիկայի բնագավառը, լինելով Հայաստանի տնտեսության կարեւոր ճյուղերից մեկը, վերջին տարիներին էական ձեռքբերումներ է գրանցել: «Այս ոլորտում տարվող աշխատանքներն ուղղված են Հայաստանի էներգետիկ անվտանգության մակարդակի բարձրացմանը, հուսալի եւ անխափան ծառայությունների մատուցմանը:
Միջազգային ֆինանսական կազմակերպությունների աջակցությամբ գրեթե ամբողջովին արդիականացվել են համակարգային նշանակություն ունեցող բարձրավոլտ ենթակայանները: Այս բնագավառում շարունակական եւ հետեւողական աշխատանքներ են տարվում նոր հզորություններ ստեղծելու, էլեկտրահաղորդման նոր գծեր կառուցելու, նոր տեխնոլոգիաներ ներդնելու ուղղությամբ:
Տարածաշրջանային առումով արդյունավետ համագործակցում ենք մեր հարեւանների՝ Իրանի Իսլամական Հանրապետության եւ Վրաստանի հետ: 2019 թվականին շահագործման կհանձնվեն Հայաստան-Իրան եւ Հայաստան-Վրաստան էլեկտրահաղորդման գծերը, որոնք լիովին նոր մակարդակի կբարձրացնեն Հայաստանի էներգետիկ համակարգը: Նշված ծրագրերի իրագործումը թույլ կտա իրականացնել էլեկտրաէներգիայի տարանցումներ, սեզոնային փոխհոսքեր եւ փոխանակումներ, առեւտրային այլ գործարքներ»,-ընդգծել է ՀՀ նախագահը:
