Ռուսաստանի Կալուգայի շրջանի «Գանձակ» սրճարանում իրավապահները ձերբակալել են 39-ամյա «օրենքով գող» Արսեն Մկրտչյանին, որը քրեական աշխարհում առավել հայտնի է «Արսեն Երեւանսկի» մականունով։ Նրա հետ միասին ձերբակալվել է եւս 9 մարդ: Ձերբակալվածներից մի քանիսի, այդ թվում Մկրտչյանի մոտ, հայտնաբերվել է թմրանյութ:
Հայտնի է, որ այժմ հանգուցյալ «օրենքով գող» «Կնդոյի» զարմիկն է Արսեն Երեւանսկին: Նա վերահսկում է Կալուգայի շրջանը, որը հաճախ անվանում են նրա «արգելոցը»։ Իր եկամուտների առյուծի բաժինը նա ստանում էր խոշոր դրամական միջոցների անօրինական կանխիկացումից, թեեւ չէր հրաժարվում մանր շորթումից: Հենց նման գործողություններից մեկի ժամանակ էլ նրան ձերբակալել են։
Իրավապահների խոսքով, Արսեն Երեւանսկին թմրամոլ է, որն արդեն չի կարողանում տեղափոխվել առանց կողմնակի օգնության։ Իրավապահների գործողության ընթացքում «օրենքով գողի» ինքնազգացողությունը վատացել է, նրա համար «շտապ օգնություն» են կանչել։
