Ադրբեջանի քաղաքացի, զինծառայող Էլնուր Հուսեյնզադեն, որին ձերբակալել են ԼՂՀ իրավապահ մարմինները, հանրային պաշտպան ունի:
NEWS.am-ի հետ զրույցում Հուսեյնզադեի փաստաբան Արկադի Իսրայելյանն ասաց, որ հանդիպել է իր պաշտպանյալի հետ: «Ես հանդիպել եմ իմ պաշտպանյալին, մասնակցել եմ նաեւ քննչական միջոցառումներին»,- ասել է փաստաբանը՝ հավելելով, որ այլ տեղեկություններ չի կարող հայտնել՝ ելնելով դրանց գաղտնիությունից:
Նախօրեին էլնուր Հուսեյնզադեին այցելել էր նաեւ ԼՂՀ ՄԻՊ Ռուբեն Մելիքյանը եւ նրան փոխանցել Մարդու իրավունքների եվրոպական կոնվենցիան ադրբեջաներենով:
Հիշեցնենք, որ ըստ ԼՂՀ ԱԱԾ տարածած հաղորդագրության` 2017թ. փետրվարի 1-ին ԼՂՀ Մարտակերտի շրջանի Թալիշ համայնքի ուղղությամբ Ադրբեջանի Հանրապետության Զինված ուժերի մի խումբ զինծառայողներ, օգտվելով մառախլապատ եղանակից, ձեռնարկել են դիվերսիայի փորձ: Փորձը խափանվել է Պաշտպանության բանակի` Արցախի պետական սահմանի պահպանությունն իրականացնող ստորաբաժանման կողմից:
Նույն օրը ժամը 15:00-ի սահմաններում Պաշտպանության բանակի մարտական դիրքերից մեկի պահպանության տեղամասում հայտնաբերվել եւ ԼՂՀ ԱԱԾ բերման է ենթարկվել ԼՂՀ պահպանվող պետական սահմանն ապօրինի հատած դիվերսիոն խմբի անդամ, Ադրբեջանի Հանրապետության քաղաքացի, Ադրբեջանի Հանրապետության Զինված ուժերի 157 մոտոհրաձգային բրիգադի հետախուզական վաշտի զինծառայող Էլնուր Էլման օղլը Հուսեյնզադեն:
Է. Հուսեյնզադեի կողմից դիվերսիայի փորձ կատարելու եւ ԼՂՀ պետական սահմանն ապօրինի հատելու փաստի առթիվ հարուցվել է քրեական գործ ԼՂՀ Քրեական օրենսգրքի 33-317-րդ հոդվածով եւ 350-րդ հոդվածի 1-ին մասով:
Է. Հուսեյնզադեն ձերբակալված է:
