Հայաստանի Վերահսկիչ պալատը կստուգի Եվրասիական տնտեսական միության շրջանակներում մաքսատուրքերի հավաքումը: Այս մասին փետրվարի 6-ին՝ խորհրդարանում ՎՊ-ի 2017-ի աշխատանքների ծրագիրը ներկայացնելիս ասաց Վերահսկիչ պալատի փոխնախագահ Արա Նռանյանը:
Նրա խոսքով՝ նախկինում ստուգումների անկողմնակալության նպատակով մի երկրի վերահսկիչ մարմինները ստուգում էին որեւէ այլ երկրի: Սակայն այդ ստուգումներն ընթանում են փոխադարձ վստահության մթնոլորտում, եւ աշխատանքների զգալի մասը ազգային վերահսկիչ մարմիններն իրենք են կատարում:
Նշենք, որ ԵՏՄ երկրների մաքսատուրքերը ընդհանուր են հավաքվում, որից հետո բաշխվում են անդամ երկրների միջեւ: Հայաստանը ընդհանուր հարկերից ավելի շատ է ստանում, քան մուծում է: Այսպես՝ 2015-ին հանրապետությունում հավաքվել է 43,9 մլրդ դրամ մաքսատուրք, իսկ լրացուցիչ ստացել է 17,6 մլրդ (վերահաշվարկով): 2017-ին ակնկալվում է, որ Հայաստանը ԵՄ հավաքած հարկից կստանա մոտ 113 մլն դոլար (53,6 մլրդ դրամ):
