![](img/news/03/72/30/default.jpg)
Նոյեմբերի 6-ին Հայաստանի նախագահ Սերժ Սարգսյանը այցելել է Լոռու մարզ:
Նախագահը նախ այցելել է Ստեփանավան քաղաք, որտեղ ներկա է գտնվել քաղաքի օրվան նվիրված միջոցառումներին՝ «Քաղաքի օր» տոնակատարությանը, Ստեփանավանի հիմնանորոգված մշոակույթի պալատի եւ նորակառույց մարզադպրոցի բացման արարողությանը: NEWS.am-ի թղթակիցը Ստեփանավանից հաղորդում է, որ նախագահին ուղեկցում է Լոռու մարզպետ Արամ Քոչարյանը:
Միջոցառումների շարք կրում է «Լոռե-Ջալալօղլի-Ստեփանավան» խորագիրը: Այս տարի լրանում է քաղաքի Ջալալօղլի անվանակոչվելու 200-ամյակը:
Ստեփանավանի տոները վերջին տարիներին նշանավորվում են նոր կառույցների բացմամբ: Ստեփանավանցիների համար այս տարվա նվերը քաղաքի վերակառուցված մշակույթի պալատի եւ մարզադպրոցի բացումն է: 2006-ին սկսվել է մշակույթի պալատի վերակառուցումը՝ պետական բյուջեի ֆինանսավորմամբ: Շինարարությունը տեւել է 4 տարի: Մշակույթի պալատն այժմ կրում է վաղամեռիկ վարչապետ Անդրանիկ Մարգարյանի անունը:
Կբացվի նաեւ Ստեփանավանի նորակառույց մարզադպրոցը, որը կառուցվել է Հայաստանի պետբյուջեի եւ Հայաստանի Սոցիալական ներդրումների հիմնադրամի համաֆինանսավորմամբ: Շինարարական աշխատանքները սկսվել են 2007-ի գարնանը, շենքը համապատասխանում է ժամանակակից սեյսմիկ եւ ակուստիկ պայմաններին:
Մշակույթի պալատի հանդիսավոր բացումը, որին ներկա կգտնվի նախագահ Սերժ Սարգսյանը, կշարունակվի տոնական համերգով:
Տոնակատարությունը կնշանավորվի նաեւ քաղաքում ճանաչված եւ աշխատանքային նվաճումներ ուnեցած մարդկանց կոչումներ շնորհելով: