Անցած շաբաթ լրատվամիջոցներում հայտնվել են ԱՄՆ նախագահ Դոնալդ Թրամփի ու Ռուսաստանի նախագահ Վլադիմիր Պուտինի հեռախոսազրույցի մանրամասները։ «Անանուն աղբյուրները հայտնել են, որ երբ Պուտինը խոսել է 2010-ին կնքված Ռազմավարական հարձակողական սպառազինումների կրճատման մասին պայմանագրի մասին, Թրամփն իր խոհրդականներին հարցրել է, թե ինչ է այդ պայմանագրով նախատեսված, ու տեղեկանալուց հետո ասել է, որ դա Օբամայի ամենավատ գործարքներից մեկն է, որոնք ինքը մտադիր է վերանայել»,- The Wall Street Journal -ում գրում է հանրապետական քաղաքական գործիչ ու դիվանագետ Ջոն Բոլթոնը։
«Եթե դա իրոք այդպես է, Թրամփը ճիշտ է հասկացել պայմանագրի էությունը»,- համարում է Բոլթոնը։ Հեղինակի խոսքով, պայմանագիրը կնքելուց հետո Մոսկվան օգտվել է դրա թույլ տեղերից, որպեսզի վերականգնի ու արդիականացնի միջուկային մարտագլխիկների ու բալիստիկ հրթիռների իր զինանոցը, քանի դեռ Օբաման ձեռքերը ծալած նստած էր»։
Բոլթոնի խոսքով «եթե պայմանագրի մասին Թրամփի մեկնաբանությունների էությունը ճիշտ է փոխանցվել, ուրեմն նա կդիմակայի Պուտինի ցանկություններին, ընդ որում ոչ մեկ անգամ»։
Օրինակ Թրամփը միանշանակ դեմ է արտահայտվել Իրանի հետ Օբամայի կնքած պայմանագրին։ Որոշ տեղեկություններով, Սպիտակ տունը քննարկում է Իսլամական հեղափոխության պահակների կորպուսը ահաբեկչական կազմակերպությունների ցանկում ներառելու հարցը, ինչը զգալի քաղաքական ու տնտեսական վնաս կհասցնի Ռուսաստանին, հատկապես «Ռոսօբորոնէքսպորտ» պետական ըընկերությանը, որը զենք է արտահանում։
«Վաշինգթոնը պետք է նաեւ դիմակայի Մերձավոր արեւելք Ռուսաստանի ներթափանցմանը,ինչն արվում է Սիրիան որպես լծակ գործածելով,- համարում է Բոլթոնը,- Պատժամիջոցների հարցում ամերիկյան թուլության ցանկացած վկայություն կնպաստի Մերձավոր արեւելք Ռուսաստանի հետագա ներթափանցմանը, ուժեղացնելով Իրանի ու Մոսկվայի մարտավարական միության վտանգավոր ու ապակայունացնող ազդեցությունը»։
Հոդվածագիրը կարեւոր է համարում Թրանփի ասածը, բայց չգիտի, թե վերջին հաշվով ինչպիսին կլինեն նրա ու Պուտինի հարաբերությունները ։ «Նա անկասկած պետք է ընդունի, որ մեծ տերությունների արտաքին քաղաքականության հիմքում ազգային շահերն են, այլ ոչ թե անձնական քիմիան»,- գրում է Բոլթոնը։ Թրամփը պետք է ուժեղացնի պատժամիջոցները , հանգստացնի ՆԱՏՕ-ի գծով դաշնակիցներին, իսկ հետո նոր «Պուտինի հետ սուրճ խմի», ամփոփում է քաղաքական գործիչը։
