Հայաստանում աուդիտորներին եւ հաշվապահներին կհավատարմագրի պրոֆեսիոնալ ասոցիացիան։ Այս մասին փետրվարի 14-ին լրագրողների հետ զրույցում ասել է Հայաստանի ֆինանսների փոխնախարար Դավիթ Անանյանը՝ ներկայացնելով օրինագծերի փաթեթը, որոնք շուտով հասարակական քննարկման կներկայացվեն։ Նախագծերը ներառում են «Հաշվապահական հավառման մասին» եւ «Աուդիտորական գործունեության մասին» օրենքի խմբագրումները, ինչպես նաեւ «Հաշվապահական հաշվառման եւ աուդիտորական գործունեության կարգավորման ու հասարակական վերահսկողության մասին» նոր օրինագիծը։
Աուդիտորների եւ հաշվապահների քննություններն ու հավատարմագրումն արդեն կիրականացնի ոչ թե ֆինանսների նախարարությունը, այլ աուդիտորների եւ հաշվապահների պալատը, որը ենթադրվում է ստեղծել համանուն ասոցիացիայի հիման վրա։
Պետությունը պալատը կվերահսկի 7 մարդուց բաղկացած խորհրդի միջոցով։ Նրանցից 4-ը կլինեն ֆինանսների նախարարությունից, 2-ը՝ Կենտրոնական բանկից, 1-ը՝ համապատասխան հասարակական կազմակերպություններից։
Բացի այդ, նախատեսվում է ստուգումներ անցկացնել աուդիտորական ընկերություններում։ Այդ հանձնարարությունը ցանկանում են առաջարկել համաշխարհային «մեծ քառյակի» աուդիտորական ընկերությունների մասնագետներին։ «2009-ին նման ստուգում արդեն տեղի է ունեցել, եւ մենք շատ գոհ ենք մնացել միջազգային փորձագետի եզրակացությունից»,-նշել է Անանյանը։
«Եթե յուրաքանչյուր տարի ստուգվի 10 ընկերություն, ապա երեք տարում հնարավոր կլինի ստուգել ամբողջ շուկան։ 3 տարին ստուգումների ընդունելի շրջան է նաեւ հենց «մեծ քառյակի» ընկերություններում»,-ասել է Անանյանը։