Արցախը շնչում է ժողովրդավարությամբ ու ազատությամբ, մինչդեռ կովկասի մնացած երկրներում դա չկա: Այս մասին, այսօր՝ փետրվարի 21-ին, լրագրողների հետ հանդիպման ժամանակ նշել է դիտորդական առաքելությամբ Արցախում գտնվող Եվրոպական խորհրդարանի պատգամավոր Յարոմիր Շտետինայը (Չեխիա), հաղորդում է «Արցախպրեսը»:
«Մեզ միշտ սպառնում են Արցախ ժամանելու համար, բայց չնայած դրան, մենք դեռեւս նրանց «սեւ ցուցակում» չենք հայտնվել: Հանրաքվեն անմիջական կապ չունի ղարաբաղա-ադրբեջանական հակամարտության լուծման գործընթացի հետ: Սահմանադրությունն ուղղակի որոշակի իրավունքներ է ամրագրում, որին երեկ «կողմ» է քվեարկել Արցախի բնակչությունը: Հուսով եմ՝ միջազգային հանրությունը կտեսնի, որ այստեղի ժողովրդավարական ինստիտուտները կայացած են: Արցախի ձայնը միշտ պետք է լսելի լինի աշխարհին»,- ասել է Յարոմիր Շտետինայ եւ հավելել, որ Արցախի ժողովուրդն արդեն ժողովրդավարության դասեր է տալիս աշխարհին ու նաեւ ունի ինքնորոշման իրավունք:
Եվրոպական խորհրդարանի պատգամավորը նաեւ նշել է, որ հետագայում Արցախի ժողովուրդն ինքը կորոշի միանալ ՀՀ-ին, թե լինել անկախ:
