ՄԱԿ–ի Միջազգային մանկական արտակարգ հիմնադրամը (ՅՈՒՆԻՍԵՖ) նախազգուշացրել է աշխարհի 4 երկրներում 1.4 միլիոն երեխայի հավանական սովամահության մասին: Խոսքը Հարավային Սուդանի, Նիգերիայի, Սոմալիի եւ Եմենի մասին է, հաղորդում է Lenta–ն ՝ վկայակոչելով BFMTV–ին։
Փորձագետների եզրակացության համաձայն, Եմենում թերսնմամբ է տառապում 462 հազար երեխա, Նիգերիայում նրանց թիվը հասնում է 450 հազարի։ Սոմալիում երաշտի պատճառով սովամահության եզրին է հայտնվել 185 հազար երեխա, մի քանի ամիս անց նրանց թիվը կարող է հասնել մինչեւ 270 հազարի։ Նույնքան երեխա սովի է մատնված նաեւ Հարավային Սուդանում։
ՅՈՒՆԻՍԵՖ–ի գործադիր տնօրեն Էնթոնի Լայքը հայտարարել է ողբերգության կանխման համար արագ միջամտության մասին։ «Մենք դեռ կարող ենք փրկել նրանցից շատերին»,– հայտարարել է նա։
Հունվարի 27–ին ՄԱԿ–ի արտակարգ օգնության տրամադրման համակարգող Սթիվեն Օ’Բրայենը հայտարարել է, որ Եմենում շարունակվող ռազմական հակամարտությունը սպառնում է իր մասշտաբներով սովամահության ամենամեծ նախադեպի պատճառը դառնալ։