Շվեդիայի ոստիկանությունը հետաքննություն է կատարում մայրաքաղաքի այն շրջանում տեղի ունեցած անկարգությունների հետ կապված, որտեղ առավելապես ներգաղթյալներ են բնակվում, փոխանցում է BBC-ի ռուսական ծառայությունը:
Անկարգությունները սկսվել են երկուշաբթի երեկոյան, երբ ոստիկանությունը փորձել է թմրանյութերի ապօրինի շրջանառության մեջ կասկածվողին կալանավորել: Ներկաները, ոմանք դիմակներով են եղել, ոստիկանների վրա քարեր են նետել, մեքենաներ հրկիզել եւ խանութներ կողոպտել:
Ոստիկանները մի քանի նախազգուշական կրակոցներ են արձակել, բայց հետո ոստիկաններից մեկը ստիպված է եղել հրազեն կիրառել, ինչը Շվեդիայում բավական հազվադեպ երեւույթ է:
Հրազենային վիրավորումների մասին տեղեկություններ չեն հաղորդվել, սակայն մի քանի մարդ, այդ թվում՝ խանութներից մեկի տերը վնասվածքներ են ստացել: Անկարգությունները շարունակվել են մինչեւ կեսգիշեր:
