Վերակառուցման եւ զարգացման եվրոպական բանկը (ՎԶԵԲ) Պարենի եւ գյուղատնտեսության կազմակերպության (ՊԳԿ) եւ Ուկրաինայի՝ կաթնամթերք արտադրողների ասոցիացիայի (ԿԱԱ) հետ համատեղ կկազմակերպի Կաթնամթերքի առաջին կովկասյան կոնգրեսը, որը տեղի կունենա 2017թ. մարտի 14-ին Վրաստանի մայրաքաղաք Թբիլիսիում, Արեւելյան Եվրոպայի՝ Կաթնամթերքի կոնգրեսի շրջանակներում:
Միջոցառմանը ներկա կլինի ավելի քան 200 մասնակից, այդ թվում` կաթնամթերք արտադրող առեւտրային ֆերմերներ, վերամշակողներ Վրաստանից, Հայաստանից, Ադրբեջանից, Ուկրաինայից, ինչպես նաեւ Արեւելյան Եվրոպայի եւ Կենտրոնական Ասիայի այլ երկրներից, եւ պոտենցիալ ներդրողներ, միջազգային կազմակերպություններ եւ կառավարության ներկայացուցիչներ:
Միջոցառումը հնարավորություն կընձեռի ուսումնասիրել կաթնամթերային անասնաբուծության ոլորտում ժամանակակից տեխնոլոգիական եւ գործարար մոտեցումները, որոնք հիմնված են իրական դեպքերի եւ տարածաշրջանի՝ կաթնամթերք արտադրողների եւ ֆերմերների միությունների փորձի վրա: Վրաստանի, Հայաստանի, Ուկրաինայի, Ադրբեջանի եւ այլ երկրների ամենահաջողված ֆերմերային տնտեսությունների մենեջերները եւ մասնագետները կբացահայտեն իրենց հաջողության գաղտնիքները: Նրանցից ոմանք արդեն հասել են տարեկան մեկ կովից ավելի քան 10 հազար լիտր կաթ արտադրողության մակարդակին, եւ արտադրողականության նման մակարդակի հնարավոր է հասնել նաեւ Վրաստանում:
Կաթնամթերքի կոնգրեսի շրջանակներում կներկայացվեն ՊԳԿ-ի եւ ՎԶԵԲ-ի համատեղ ծրագրի՝ «Վրաստանի կաթնամթերքի արտադրության ոլորտում սննդամթերքի անվտանգության բարելավում՝ կարողությունների ստեղծման միջոցով» հիմնական դրույթները, ինչպես նաեւ կներկայացվեն առաջարկություններ կաթնամթերքի բիզնեսի հետագա զարգացման վերաբերյալ:
Կոնգրեսի երկրորդ օրը մասնակիցները հնարավորություն կունենան այցելելու Վրաստանում կաթնամթերք արտադրող առեւտրային ֆերմաներ, որտեղ արդեն հաջողությամբ կիրառվում են առաջադեմ տեխնոլոգիաներ:
Կովկասի՝ կաթմամթերքի միջազգային կոնգրեսը գիտելիքների եւ տեխնոլոգիաների փոխանակման հարթակ կստեղծի տարածաշրջանի ֆերմերների եւ կաթնամթերային բիզնեսով զբաղվող այլ անձանց համար, ովքեր հետաքրքրված են ժամանակակից կաթնամթերային բիզնեսի զարգացման ուղիներով:
