Երեւանում կայացել է «Ստեփանակերտի շրջափակման ճեղքում․ 25 տարի անց» փաստագրական ֆիլմի շնորհանդեսը։ Ֆիլմը պատրաստել էր Հայաստանի նախագահին առընթեր «Տեղեկատվության ու հասարակական կապերի կենտրոնը»։

Ֆիլմի համահեղինակ Արմեն Մինասյանի խոսքով ֆիլմում չկա հեղինակի խոսք, այն հիմնված է բացառապես ականատեսների վկայությունների վրա։ Ֆիլմը նվիրված է 1991-92 թթ իրադարձություններին, երբ Ստեփանակերտը շրջափակման մեջ էր։ «Շուշիի ու Լաչինի ազատագրումով մայրաքաղաքն ամբողջությամբ ազատվեց արգելափակումից ու մարդիկ կարողացան հանգիստ ապրել»,- նշել է ՄԻնասյանը։

Ֆիլմի համահեղինակը նշել է, որ ֆիլմի ստեղծումը նախաձեռնելու համար եղել են մի քանի պատճառներ։Առաջին հերթին այն, որ ադրբեջանական կողմը հետեւողականորեն կեղծում է այդ տարիների իրադարձությունները։ Ֆիլմի ստեղծումը ավելի շուտ էր ծրագրված, սակայն միայն հիմա է հնարավոր դարձել, քանի որ արդեն կուտակվել են բավականաչափ արխիվային կադրեր։ Պատճառներից մեկն էլ այն է, որ անհրաժեշտ է միջազգային հասարակայնությանը հիշեցնել, թե ինչ է նախորդել հրադադարի ռեժիմի սահմանմանը, եւս մեկ անգամ ներկայացնելով փաստեր ադրբեջանական ագրեսիայի մասին։