Լեռնային Ղարաբաղն անպաշտպան չի մնա այն պատճառով, որ Հայաստանն զբաղված է խորհրդարանական ընտրություններով: Այս մասին փետրվարի 27-ին կայացած մամուլի ասուլիսի ժամանակ ասաց Հանրապետական կուսակցության փոխնախագահ Արմեն Աշոտյանը՝ ի պատասխան NEWS.am-ի թղթակցի սահմանին նոր լարվածության հնարավորության մասին հարցին՝ հաշվի առնելով Հայաստանի եւ Լեռնային Ղարաբաղի սահմանին Ադրբեջանի կողմից հրադադարի ռեժիմի վերջին խախտումները:
Նրա խոսքով՝ այս հարցի լավագույն պատասխանը «Երկրապահ» կամավորականների միության 11-րդ համագումարում տվել է երկրի նախագահը: «Հարեւանները մտածում են, որ առաջիկա խորհրդարանական ընտրությունները ժողովրդի եւ Հայաստանի իշխանությունների ուշադրությունը կշեղեն սահմանների պաշտպանությունից, Լեռնային Ղարաբաղին անպաշտպան կթողնեն եւ Ադրբեջանի համար հնարավորություն կստեղծեն օգտվելու մեր, այսպես կոչված՝ «խոցելի» իրավիճակից: Ակնհայտ է, որ մեր Զինված ուժերը եւ ամբողջ հասարակությունը պատրաստ են արժանի պատասխան հարված հասցնելուն»,- ընդգծեց Աշոտյանը՝ շարունակելով, որ անհրաժեշտ է դատապարտել սահմանային վերջին միջադեպերը: «Բայց այդ միջադեպերը մեր Զինված ուժերի եւ ժողովրդի համար նաեւ հնարավորություն էին ցույց տալու, որ ներքին խնդիրները, ներքին իրավիճակը չեն կարող առաջնահերթություններից, անվտանգության հարցերից մեր ուշադրությունը բաժանել, շեղել»,- նշեց Աշոտյանը: