Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով դատական նիստին այսօր՝ փետրվարի 27-ին, հարցաքննվեց Վազգեն Սարգսյանի անվան ռազմական ինստիտուտի կուրսանտ Ասատուր Շահնազարյանը: Նա նշեց, որ 2015թ. հունվարի 28-ին հերթապահ է եղել, սակայն, հերթապահության ընթացքում քնել է եւ դեպքից ոչինչ չի հիշում:
«Ժամը 06:10 րոպե վերակարգի հերթապահություն եմ ընդունել, 10:30 դադարից հետո ծառայությունը թերի եմ կատարել, քնել եմ եւ իմ վաշտում շարժ է տեղի ունցել, տղաները առաջին հրետանային մարտկոց են բարձրացել` խմիչք օգտագործելու»,-ասաց նա:
Նա նշեց, որ ամբաստանյալներից միայն Վարազդատ Սաֆարյանին է ճանաչում, մյուս չորս ամբաստանյալներին ընդամենը ինստիտուտում է տեսել: Նրա խոսքով, սպանված կուրսանտ Հայկազ Բարսեղյանին եւս չի ճանաչում, իսկ նրա սպանության մմասին միայն առավոտյան է լսել:
Դատարանը հրապարակեց Ասատուր Շահնազարյանի նախաքննական ցուցմունքը, ըստ որի իր հերթապահության ժամանակ պահասենյակում մի խումբ կուրսանտներ ոգելից խմիչք են օգտագործել, այնուհետեւ սուրճ են պատրաստել, ինքը դիտողություն է արել, որ հանգստություն պահպանեն: Այնուհետեւ քնել է, առավոտյան էլ իրենց հարցրել են` կուրսանտ Հայկազ Բարսեղյանին տեսնող եղել է, իր կողքին կանգնած կուրստաներից մեկն էլ պատասխանել է` այո, այդ ժամանակ Վաչե Սահակյանը մոտեցել է իրենց եւ հարցրել, թե ինչ են տեսել:
«2:30-ին քնել եմ, հետո արթնացել եմ, տեսել եմ, որ օրապահը չկա: Մտել եմ ննջարան եւ արթնացրել Արթուր Սիմոնյանին եւ ասել, որ ծառայությունը նորմալ տանի, բայց տեղում չի գտել նրան կրկին: Աչքս կպել է, քնել եմ, Արթուր Սիմոնյանի ձայնից եմ արթնացել նորից, քանի որ զորամասի հերթապահն էր եկել: Էդ գիշեր Արթուր Սիմոնյանը լոգարան է մտել, մի քանի հոգու տեսել է, սակայն, ասում ա, որ ոչ մեկի դեմքը չի հիշում: Բայց հնարավոր ա, որ հիշումա , բայց խուսափում ա ասել, մենք բոլորս էլ մեղքի զգացում ունենք, որ Հայակզի հետ նման բան ա պատահել»,-նախաքննական ցուցմունքում ասել է նա:
Նա նաեւ նշել է, որ այդ օրը գիշերը զինվորական հագուստով, օձիքը վերեւ բարձրացրած մեկին է տեսել, որը վազել է. «Զինվորական բաճկոնով, օձիքը վերեւ իջավ ներքեւ, Վաչեին ասացի, նա ասաց` լավ ու հեռացավ: Որեւէ մեկին դժվարանում եմ նմանեցել այդ վազողին, որովհետեւ մի պահ եմ նկատել նրան»:
Նա նաեւ իր ցուցմունքում նշել է, որ, երբ առավոտյան ասել են, որ Հայկազ Բարսեղյանին սպանել են, Վարազդատ Սաֆարյանը սկսել է դողդողալ:
«Երբ իմացավ սպանության մասին, ինձ անընդհատ փորձում էր համոզել, որ մարտկոցից շուտ է իջել: Բայց ես հիշում էի, որ Դավիթն ու Վարազդատը 00:00-ի սահմանում են մարտկոցից իջել: Երբ աստիճաններից իջնում էին, ասացի` գնացեք քնելու, Վարազդատը բան չասաց, բայց հոտից զգացի, որ ալկոհոլ են խմել: Երբ արդեն բոլորս իմացանք, որ Հայկազին կախված վիճակում են գտել, Վարազդատը սկսեց դողդողալ, բոլորից ծխախոտ էր ուզում»-ասել է նա:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք 2015թ. հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում:
