Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով դատական նիստերի անընդհատ հետաձգումը դժգոհություն է առաջացրել սպանված կուրսանտի հարազատների մոտ: NEWS.am-ի հետ զրույցում Արկադի Բարսեղյանը նշեց, որ նիստերի անընդհատ հետաձգման մեջ որեւէ միտում չի տեսնում, բայց պետք է հաշվի առնել այն, որ ինչքան անցնում է ժամանակը, այնքնա քրեական գործով որպես վկա ճանաչված կուրսանտները քիչ բան են հիշում կատարվածից:
«Վկան, երբ ասում ա, որ երկար ժամանակ է անցել դեպքից, չի հիշում մանրամասներ, պաշտպանական կողմի փաստաբանները որդոհվում են, թե ոնց չես հիշում: Հիմա նորից 20 օրով նիստը հետաձգեցին իրենց պաշտպանի միջնորդությամբ, ժամանակն անցնում է, իրենց մեղքով նիստերն հետաձգվում են, հետո էլ վկաների մասով դժգոհ են մնում»,-ասաց նա:
Արկադի Բարսեղյանի խոսքով, իր որդին սպանվել է հետագայում շատերի կյանքը փրկելու համար:
«Երբ վկաները ցուցմունք են տալիս, ես նայում եմ էդ չորս տականքների դեմքերին, նրանց դեմքը վայրենի արտահայտություն է ստանում, երբ վկաներից մեկը գրագետ, կոնկրետ, նորմալ պատմում է՝ ինչ է տեղի ունեցել: Եթե Հայկազի հետ էդ դեպքը չկատարվեր, իրանք ինստիտուտը վերջացնելուց հետո որեւէ զորամասում ծառայության պետք է անցներին եւ վայ էն զորամասը, որտեղ որ նրանք պետք է ծառայեին, շատերի երեխեքը պետք է Հայկազի ճակատագրին արժանանային: Միգուցե իմ երեխան զոհ գնաց մնացածի փրկության համար, եթե Հայկազի հետ էդ դեպքը չլիներ, էս տականքները մնային, ավելի մեծ, վատ բաներ էին անելու»,-ասաց նա:
Նշենք, որ Հայկազ Բարսեղյանի սպանության գործով կա 25 վկա կուրսանտ, մինչ այս պահը հարցաքննվել է նրանցից 11-ը:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք 2015թ. հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում: