Ղարաբաղա- ադրբեջանական շփման գծում փետրվարի 24-ի լույս 25-ի գիշեր տեղի ունեցածը ոչ թե բացահայտ հարձակում էր, այլ նախապատրաստում էր լայնածավալ գործողությունների: Այսօր` փետրվարի 28-ին, լրագրողների հետ հանդիպմանն ասաց Կենտրոնական հրամանատարության հետախույզ, դիվերսիոն հատուկ նշանակության ջոկատի հիմնադիր-հրամանատար, ազատամարտիկ Վովա Վարդանովը:

«Լայնամասշտաբ գործողություն հնարավոր է, սակայն եթե ապրիլը հիշենք, դա պատերազմի իմիտացիա էր: Ադրբեջանը փորձելու է նման բաներ անել, որ հասարակության ուշադրությունը շեղի ներքին խնդիրներից: Մենք պետք է մեր անելիքները որոշենք. սահմանն այն աստիճանի պետք է պահել, որ ցանկացած առաջխաղացում հակառակորդի մոտ ծիլ տալու պահին ոչնչացվի: Եթե ապրիլյան գործողությունները վերհիշենք, ադրբեջանական կողմը սկսել էր չեզոք գոտին նախապատրաստելով` ինժեներական աշխատանքներ, ականապատում, փոսերը խորացնել: Հիմա էլ էին նմանատիպ աշխատանք փորձում կատարել: Այնքան էլ ճիշտ չէ ասել, որ բացահայտ հարձակում է եղել, սա ավելի շուտ նախապատրաստում է լայնածավալ գործողությունների»,- ասաց Վովա Վարդանովը:

Հետախույզի խոսքով` եթե ապրիլին էլ ճիշտ ձեւով արձագանքեինք, այսքան կորուստ չէր լինի: Նրա կարծիքով, ապրիլյան պատերազմից հետո հայկական կողմը դասեր է քաղել. Այսօր բոլոր դիրքերում կան սարքավորումներ, որոնցով ցանկացած ժամի եւ եղանակի հնարավոր է հայտնաբերել հակառակորդի ինժեներա-սակրավորային կամ դիվերսիոն-հետախուզական խմբերի:

Հիշեցնենք, որ փետրվարի 25-ին՝ ժամը 03:00-ի և 04:00-ի սահմաններում, շփման գծի միանգամից երկու` հարավարևելյան (Մարտունի) և արևելյան (Ակնա) ուղղություններով հակառակորդը, օգտագործելով ականազերծման համապատասխան տեխնիկա և հատուկ միջոցներ, ձեռնարկել է հարձակման փորձ։

«ՊԲ առաջապահ ստորաբաժանումները, նաև շնորհիվ տեսադիտարկման սարքավորումների, երկու ուղղություններում էլ ժամանակին հավաստանշել են ադրբեջանական ստորաբաժանումների առաջխաղացումը և կորուստներ պատճառելով հետ շպրտել ելման դիրքեր:

Բանակի առաջապահ ուժերի պատասխան գործողությունների արդյունքում հակառակորդը տվել է զոհեր և վիրավորներ: Մի քանի դիակ գտնվում է չեզոք գոտում: Հայկական կողմը զոհեր ու վիրավորներ չունի»,-ասված էր Արցախի ՊԲ մամուլի հաղորդագրությունում:

Փետրվարի 27-ին ժամը 17:00-ի սահմաններում հակառակորդն իր 5 դիակներին դուրս էր բերել չեզոք գոտուց: Ըստ պաշտպանության բանակի համապատասխան ծառայությունների կողմից ձեռքբերված տվյալների՝ զոհվածների թվում են Ադրբեջանի ԶՈւ 181-րդ բրիգադի հետախուզության պետ, մայոր Աբդուլաեւը, բրիգադի հետախուզական վաշտի հրամանատար, ավագ լեյտենանտ Աշիմլի Շախլարը, հետախույզ Ադըհուսեյնովը ու եւս երկու զինծառայող, որից մեկը՝ սակրավոր: