Արցախում հունվարի 16-ին կրտսեր սերժանտի կողմից վիրավորված եւ մեկ ու կես ամիս անց ՀՀ ՊՆ կենտրոնական կլինիկական զինվորական հոսպիտալում մահացած Գուրգեն Սարգսյանն ամռանը զորացրվելու էր: Գուրգեն Սարգսյանը Վայոց ձորի Հորբատեղ գյուղից էր, ուներ իրենից մեծ քույր եւ փոքր եղբայր: NEWS.am-ի հետ զրույցում Հորբատեղի գյուղապետ Գագիկ Սանդրոսյանը նշեց, որ Գուրգեն Սարգսյանը սոցիալապես ծանր պայմաններում ապրող ընտանիքից էր:

«Շատ լավ երեխա էր, էս ամռանը գալու էր բանակից: Էս վերջին դեպքերն ավելի ընկճեցին առանց այն էլ ծանր պայմաններում ապրող ընտանիքին»,-ասաց նա:

Ավելի վաղ NEWS.am-ը տեղեկացրել էր, որ ժամկետային զինծառայող, շարքային Գուրգեն Հարությունի Սարգսյանը գլխի շրջանում հրազենային վիրավորումն ստացել էր հունվարի 16-ին՝ ժամը 23:55-ի սահմաններում՝ N զորամասի պահպանության տակ գտնվող մարտական դիրքում հերթապահություն իրականացնելիս, եւ անմիջապես տեղափոխվել զինհոսպիտալ:

Նախաքննությամբ ձեռնարկված միջոցառումների արդյունքում պարզվել են զինծառայողի՝ հրազենային վիրավորում ստանալու հանգամանքները, եւ ձեռք բերված բավարար ապացույցների հիման վրա՝ կրտսեր սերժանտին մեղադրանք է առաջադրվել՝ ՀՀ քրեական օրենսգրքի 373-րդ հոդվածի 2-րդ մասով։ Նրա նկատմամբ որպես խափանման միջոց է ընտրվել կալանավորումը։