Բազալտե թելքից հայկական կոնստրուկցիաները պատրաստվում են արտահանել: Այս մասին NEWS.am-ի թղթակցի հետ զրույցում հայտնեց Արգելի բազալտե թելքի գործարանի տնօրեն Էդիկ Գրիգորյանը՝ հավելելով, որ ընկերությունը Եվրոպայում ավարտում է սերտիֆիկացման գործընթացը:
Կոտայքի մարզի Արգել գյուղում տեղակայված գործարանի ներդրումային ծրագիրը վերջերս արժանացել է կառավարության հավանությանը:
«Մենք քիչ էինք խնդրում: Նյութապես կարող ենք ինքնուրույն գործել: Ուզում ենք միայն, որպեսզի թույլատրվի շինարարության մեջ բազալթե կոնստրուկցիաներ կիրառել: Կառավարությունն ընդառաջեց մեզ: Հիմա խնդրում ենք շինարարական անհրաժեշտ նորմեր սահմանել: Ռուսաստանում դրանք արդեն կան, մնում է միայն տեղայնացնել դրանք»,- նշեց Գրիգորյանը:
«Հայաստանում ձեռնարկություններ կան, որոնց մատակարարումներ իրականացնում ենք: Մեր թելքից նրանք շինարարական կոնստրուկցիաներ են ստանում: Բայց կարելի է նաեւ շատ այլ բան ստանալ, օրինակ՝ մեր անօդաչու օդանավերի համար կմախք: Այսինքն՝ Հայաստանում կարող է շղթայական մի քանի ձեռնարկություն աշխատել: Դրանք միայն երազանքներ չեն: Օրինակ՝ Audi-ն արդեն անցնում է բազալտե պարույրների: Իսկ Չինաստանում պետությունն օգնում է տարեկան 30 հազար տոննա արտադրական հզորությամբ բազալտե թելերի գործարան կառուցել:
Հասկանալի է նման հետաքրքրությունը. բազալտե կոնստրուկցիաները 6.5-7 անգամ ավելի թեթեւ են պողպատից, ամրությամբ գերազանցում են 3 անգամ: Բացի այդ, դրանք կորոզիայի չեն ենթարկվում: Իսկ Հայաստանում բազալտը շատ լավ որակական հատկանիշներ ունի: Մնում է օգտվել դրանից»,- հայտարարեց Գրիգորյանը:
Ավելի վաղ ընկերությունը բազալտե թելեր էր արտահանում Ռուսաստան, բայց ռուբլու փոխարժեքի տատանումից հետո ստիպված եղավ դադարեցնել: Հիմա ավարտին են հասցնում եվրոպական մի քանի կազմակերպություններում սերտիֆիկացման երկրորդ փուլը:
«Մենք արդեն նախնական համաձայնություն ունենք Ասիայում աշխատող շինարարական երկու ընկերությունների հետ: Նրանց պատվերով սերտիֆիկացում ենք անցնում: Երբ գործընթացն ավարտվի, մեզ հետ կանոնավոր մատակարարումների պայմանագիր կկնքեն: Այսինքն՝ նորից կսկսենք աշխատել»,- ամփոփեց Գրիգորյանը: