Հայաստանում մի շարք բանկեր կին ձեռնարկատերերին արդեն ավելի մատչելի վարկեր են տալիս, եւ այս հարցում պատրաստ են օգնել եվրոպական կառույցները: Մարտի 7-ին այս մասին հայտարարեց Հայաստանում Վերակառուցման եւ զարգացման եվրոպական բանկի ներկայացուցչության ղեկավար Մարկ Դեւիսը՝ ներկայացնելով կանանց ձեռնարկատիրության աջակցության ծրագիրը:
Իզուր չէ, որ կանանց բիզնեսին վստահում են, հավելեց նա՝ այս ձեռնարկությունները ավելի բարեխիղճ են մարում վարկերը ինչպես Հայաստանում, այնպես էլ ամբողջ աշխարհում: Հայաստանում վարկառու կանանց շրջանում անվճարունակությունը կազմում է 5,5 տոկոս, տղամարդկանց շրջանում՝ 7,7 տոկոս: «Իհարկե, դիտարկումների ընտրությունն այնքան էլ մեծ չէ, սակայն ինչ-որ բանի մասին վկայում է»,- նշեց Դեւիսը:
Նրա խոսքով՝ կանանց ձեռնարկատիրության ծրագիրն իրականացվում է ոչ միայն Հայաստանում, այլեւ «Արեւելյան գործընկերության» բոլոր 6 երկրներում: Այդ նպատակով ՎԶԵԲ-ը 44 մլն դոլար է հատկացրել, որը պետք է ուղղվի մատչելի վարկեր տրամադրելուն:
Վարկավորման տեխնիկական աջակցությունը կցուցաբերեն Շվեդիայի կառավարությունը եւ Եվրամիության եվրոպական հարեւանության քաղաքականության ներդրումային գործիքը (NIF): Ստոկհոլմը 47 մլն շվեդական կրոն կհատկացնի (մոտ 5,2 մլն եվրո), իսկ NIF-ը՝ 4,5 մլն: Եվս 0,9 մլն եվրո կհատկացնի ՎԶԵԲ-ի հիմնադրամը՝ վաղ անցումային տնտեսությունների համար:
Հայաստանում ծրագրին են միացել «Ամերիաբանկը» եւ ACBA Credit Agricole բանկը, իսկ շուտով պատրաստվում է միանալ «Արարատբանկը»: