Սիրիայի Զինված ուժերի հրամանատարությունը հայտարարել է, որ երկրի ՀՕՊ-ը խոցել է իսրայելական չորս ռազմական օդանավերից մեկը, որոնք խախտել են Սիրիայի օդային տարածքը: Այս մասին գրում է սիրիական պետական ՍԱՆԱ գործակալությունը:
Հայտարարության համաձայն՝ իսրայելական չորս օդանավեր տեղական ժամանակով 2:40-ին Սիրիայի օդային սահմանը խախտել են Ալ-Բրայա շրջանում, լիբանանյան տարածքի մոտակայքում:
Իսրայելական օդանավերի թիրախում Հոմսի արեւելյան շրջանում Պալմիրայի մերձակայքում տեղակայված ռազմական հրապարակն է եղել: Սիրիական ուժերը հակազդել են իսրայելական օդանավերին եւ խոցել մեկ ինքնաթիռ՝ մյուսներին ստիպելով հեռանալ երկրի տարածքից:
