«Ելք» դաշինքի անդամ Նիկոլ Փաշինյանը կտրվել է իրականությունից, ինչի մասին վկայում են նրա վերջին հայտարարությունները։ Այդ մասին NEWS.am-ի հետ զրույցում ասաց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը։
«Նախընտրական փուլում Նիկոլ Փաշինյանն ամբողջովին կտրվել է իրականությունից։ Քարոզչության ընթացքում այնքան է շենքերի ու ավտոտնակների տանիքներ բարձրացել, որ երեւի գլխապտույտի մեջ է ընկել ու նման հայտարարություններ է անում։ Արդեն չի զգում ոտքի տակի հողը, լրիվ կտրվել է իրականությունից»,– ասաց Շարմազանովը։
Նշենք, որ երեկ կայացած ասուլիսում Նիկոլ Փաշինյանն անդրադարձել էր Շարմազանովի այն մեղադրանքներին, թե որոշ քաղաքական ուժեր փորձում են Արթուր Սարգսյանի մահը շահարկել նախընտրական քարոզչության շրջանում դիվիդենտներ շահելու նպատակով։
«Շարմազանովին ասեք, թող հստակեցվի, եթե մեղադրանքները մեզ են ուղղված ես իրեն կպատասխանեմ: Էս պահին կարող եմ ասել՝ նա մի ռեժիմի ներկայացուցիչ է, որը սպանեց Արթուր Սարգսյանին։ Առհասարակ, նման քննադատություն մեզ որեւէ մեկը չի կարող ուղղել, որովհետեւ երբ որ Արթուր Սարգսյանը կալանավորված էր ու հացադուլի մեջ էր, առաջին օրվանից մենք զբաղվել ենք դրանով եւ մեզնից կախված մաքսիմում ջանքերը գործադրել ենք, որպեսզի նա օր առաջ, ժամ առաջ, րոպե առաջ հայտնվի ազատության մեջ»,–ասել էր Նիկոլ Փաշինյանը։
