Տավուշի մարզի Բերդ քաղաքում ընտրողները վարչապետ Կարեն Կարապետյանի հետ հանդիպմանը բարձրացրել են գյուղատնտեսության ոլորտում ապահովագրության համակարգ ներդնելու հարցը:
«Գյուղացուն շատ օգնած կլինեիք, եթե գյուղատնտեսությունն ապահովագրվեր կամավորության սկզբունքով: Այս կերպ աշխատատեղ կստեղծվեր, մեր աշխատատեղը թողած՝ ուրիշից ենք պահանջում»,-այսօր՝ մարտի 18-ին կայացած հանդիպման ժամանակ ասել է բնակիչներից մեկը՝ նշելով, ռիսկայնության պատճառով անմշակ հողեր կան, Բերդից հաղորդում է NEWS.am-ի թղթակիցը:
Կարեն Կարապետյանը համաձայնել է. կառավարությունն այս տարի փորձնական ծրագրով 5 մլն եվրո է հատկացել գյուղատնտեսության ապահովագրության համար: «Պիլոտային ծրագրի ներդրմամբ մենք կհասկանանք թույլ եւ ուժեղ կողմերը: Այսօր, ցավոք, հենց խոսում ենք ապահովագրությունից, ապահովագրողն ասում է՝ լրացուցիչ բեռ ես դնում իր վրա»,- նշեց վարչապետը:
Անդրադառնալով կամավոր ապահովագրության մասին քաղաքացու առաջարկին՝ Կարեն Կարապետյանը նշեց, որ կամավոր ապահովագրության դեպքում անհրաժեշտ է ապահովել կոնկրետ ծավալ, հակառակ դեպքում համակարգը չի աշխատի: «Այսպիսով, մենք կգնահատենք ռիսկերը եւ կհասկանանք՝ եթե նման առաջարկությամբ հանդես գանք, ինչ արձագանք կստանանք: Հանկարծ չստացվի, որ լավ բանը սխալ սկսենք, քոքից կտրենք ու հետ ընկնենք»,- հավելեց Կարապետյանը: