Նախընտրական արշավը բավական ակտիվ է ընթանում: Մարտի 20-ին կայացած մամուլի ասուլիսի ժամանակ այս մասին հայտարարեց «Ազատ դեմոկրատներ» կուսակցությունից պատգամավորի թեկնածու Հրանտ Բագրատյանը:
Նա միաժամանակ հայտարարեց ընտրողներին զանգվածաբար կաշառելու մասին: Նրա խոսքով՝ բացառություն է կազմում Երեւանի կենտրոնը: Նա նշեց, որ դրանով հիմնականում զբաղված են 2 ուժեր, «դուք գիտեք՝ որոնք են, դրանցից մեկն իրեն ընդդիմադիր է ներկայացնում»: «Կարող եմ սԵղմ այսպես բնութագրել».,- ասաց Բագրատյանը:
Երկրի տնտեսության եւ իր ներկայացրած քաղաքական ուժի դիրքորոշման մասին խոսելիս Բագրատյանը հայտարարեց, որ իրենք հանդես են գալիս ազատ տնտեսության օգտին, իսկ տնտեսական վիճակն աղետալի է: «ԵՏՄ-ը մեզ կաշկանդում է»,- համոզված է Բագրատյանը: Նրա խոսքով՝ հիմա համագործակցության այնպիսի ձեւ է հաստատվել, որի պայմաններում Հայաստանը մշտապես զիջում է: Սակայն հույս կա, որ ինչ-որ բան կարող է փոխվել:
Քաղաքական կանխատեսումներին առնչվող հարցին պատասխանելիս Բագրատյանը կտրուկ հայտարարեց, որ սոցհարցումների արդյունքները չի մեկնաբանում: «Կա՛մ վատ, կա՛մ ոչինչ: Նախընտրում եմ ոչինչը»,- նշեց պատգամավորը:
Սեփական կուսակցության ծրագրի վերաբերյալ Բագրատյանը բարձր գնահատական արտահայտեց՝ հեգնանքով անդրադառնալով մրցակիցների ծրագրերին: Բագրատյանի քննադատության մեջ բացառություն էին կազմում ՀՀԿ-ի մոտեցումները:
