Եգիպտոսի նախկին նախագահ Հոսնի Մուբարաքի փաստաբան Ֆարիդ ադ-Դիբը վստահեցնում է, որ իր պաշտպանյալը դեռեւս գտնվում է Մաադի ռազմական հոսպիտալում, գրում է «Շուրուք» պարբերականը:
«Մուբարաքը դեռեւս Մաադի ռազմական հիվանդանոցում է: Այն, որ խոսում են այն մասին, թե նրա որդի Գամալն ու անձնական բժիշկն իբր թե Մուբարաքին Հելիոպոլիս են ուղեկցել, ամբողջությամբ չի համապատասխանում իրականությանը»,- ասել է պաշտպանը: Նա նաեւ ասել է, թե չգիտի` երբ նախկին նախագահը կկարողանա լքել հոսպիտալը:
Սակայն Մուբարաքին կողմնակից «Աբնա Մուբարաք» խմբի անդամը «ՌԻԱ Նովոստի»-ին հաստատել է, որ նախկին նախագահը ռազմական հոսպիտալից արդեն տուն է տեղափոխվել:
«Այո, նա արդեն տանն է»,- ասել է գործակալության զրուցակիցը: