«Կոնգրես-ՀԺԿ» դաշինքի նախընտրական քարոզարավի ժամանակ այսօր՝ մարտի 21-ին, ստեփանավանցիներից մեկը Լեւոն Զուրաբյանից հետաքրքրվեց՝ որոնք են իսկապես իշխանություն, որոնք ընդդիմադիր:
«Էդ կուսակցություններին դուք շատ լավ գիտեք, որովհետեւ էդ կուսակցությունները գալիս են, ձեզ ընտրակաշառք առաջարկում: Դուք շատ լավ գիտեք, ես չպետք է ձեզ ասեմ: Ժողովուրդը մասսայաբար գիտի: Նրանք ժողովրդի դռներն են թակում, մտնում ու առաջարկում: Չգիտե՞ք՝ ով ա»,- խուսափողական պատասխան տվեց Լեւոն Զուրաբյանը:
Քաղաքացին նշեց, որ ինքը կցանկանար Լեւոն Զուրաբյանից կոնկրետ անուններ լսել: Ավելի ուշ, NEWS.am-ի հետ զրույցում ստեփանավանցին ասաց, որ մարդիկ երբեմն կասկածներ ունեն, թե ովքեր են իրական ընդդիմություն:
«Էսօր ո՞վ ա իշխանությունից մի 3-4 ամիս առաջ դուրս գալիս, ընդդիմություն խաղում, ընդդիմություն են ձեւացնում, հետո նորից գնում են իշխանություն: Ես ուզում էի՝ պարոն Զուրաբյանն ասի, որ էն մնացած խեղճ ու կրակ ժողովուրդն իմանան, լսեն»,- ասաց նա:
Նշենք, որ դաշինքը մարտի 21-ին Լոռու մարզում նախընտրական հանդիպումներ է ունեցել ընտրողների հետ:
