ՀՀ վարչապետ Կարեն Կարապետյանը Արտաշատում հաշվետու է եղել ընտրողներին՝ իր կես տարվա աշխատանքի վերաբերյալ։

Մարտի 22-ին Արտաշատում ելույթ ունենալով Հայաստանի հանրապետական կուսակցության հանրահավաք-հանդիպման ժամանակ՝ Կարեն Կարապետյանը հիշեցրել է, որ հոկտեբերի 20-ին հայտարարվեց կես տարվա աշխատանքի ծրագիրը։

«Գործընկերներս փորձում էին ինձ համոզել, ապացուցել, որ այն շատ ամբիցիոզ է, եւ հետո մենք ստիպված կլինենք բացատրել, թե ինչու դա չի արվել։ Սակայն ծրագրված ամեն ինչն արված է», - հայտարարել է Կարեն Կարապետյանը։

Նրա խոսքով՝ կես տարում արդյունաբերությունն աճել է 11,5 տոկոսով, 109 տոկոսով՝ գյուղատնտեսությունը, ավելի քան 100 տոկոսով՝ մետալուրգիական արդյունաբերությունը, 150 տոկոսով՝ ալկոհոլի արտադրությունը, եռակի աճել է ոսկերչական գործն ու 20 տոկոսով՝ արտահանումը։

«Տրամաբանական է, եթե դուք հարցնեք՝ թվերը լավ են, բայց կյանքի որակը չի բարելավվել։ Իսկապես, մեր սոցիալ-տնտեսական դրությունն այնպիսին է, որ կյանքի բարելավման ուղղությամբ պետք է աշխատել։ Դա նման է այն բանին, եթե  հողը երկար չես ջրում, այն պետք է նախ լավ ջրել, որպեսզի սերմերը ծիլ տան», - նշել է վարչապետը։

Նա նաեւ խոսել է ներդրումային ոլորտում նախագծերի մասին, ներկայացրել ՀՀԿ նախընտրական ծրագրի որոշ դրույթներ։