ՀՀ վարչապետ Կարեն Կարապետյանը լավ խոսում է, համակրելի շարժուձեւ ունի, բայց ինքը որոշողը չէ, որոշողը Սերժ Սարգսյանն է լինելու, որի համար բոլոր հանրապետականները «գլադիատորի նման կռիվ են տալիս» ոչ միայն այլ քաղաքական ուժերի հետ, այլեւ միմյանց հետ։ Այս մասին, այսօր՝ մարտի 25-ին, Մեծամորում նախընտրական քարոզարշավի ընթացքում հայտարարել է «Օհանյան-Րաֆֆի-Օսկանյան» դաշինքի ցուցակի 2-րդ հորիզոնականը զբաղեցնող Արմեն Մարտիրոսյանը։
«Կայսրը վերեւում նստած հաճույք է ստանում գլադիատորների պայքարից, որովհետեւ գլադիատորների պայքարը բացառապես իր համար է։ Մենք չենք ուզում Հայաստանը վերածել գլադիատորական մարտերի հարթակի։ Մենք չենք ուզում, որ Հայաստանում հայրն ու տղա էդ ռեյտինգային ընտրակարգի պատճառով իրար հետ բախման մեջ լինեն։ Պավլիկ Մորոզովներ են բուծում։ Կոմունիստական կուսակցության դասերը, ցավոք սրտի, Սերժ Սարգսյանը բառացի է անգիր արել։ Պավլիկ Մորոզովի կերպարը իր համար շատ հարազատ է, եւ հիմա նա ցանկանում է դա ներմուծել Հայաստան», - ընդգծել է Մարտիրոսյանը։
