«Սարի թաղի» բախումների գործով մեղադրյալ Էդուարդ Զեյթունյանը, որը մարտի 24-ից հացադուլ է հայտարարել, բողոքում է, որ իրեն բժշկական օգնություն չի ցուցաբերվում: Այս մասին այսօր՝ մարտի 27-ին, NEWS.am-ի հետ զրույցում ասաց նրա կինը՝ Լալա Բեռնեցյանը՝ նշելով, որ այդ մասին տեղեկացել է ամուսնուց:
«Արդնե 4-րդ օրը հացադուլի մեջ է, իրեն վատ է զգում, պահանջել է, որ բժիշկներն այցելեն, օգնություն ցուցաբերեն, բայց ոչ ոք չի այցելել, նրա վիճակը շատ վատ է »,- ասաց Լալա Բեռնեցյանը:
Նա հացադուլով պահանջում փոխել իր խափանման միջոց կալանքը եւ ազատ արձակել:
Հիշեցնենք, որ ըստ մեղադրական եզրակացության՝ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն ու Էդուարդ Զեյթունյանը 2016թ. հուլիսի 19-ին ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ: Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով: Բոլորն էլ կալանավորված են: Կալանավորվածների հարազատները մինչդեռ պնդում են՝ նրանք ընդամենը պահանջել են, որ իրենց հոսանքն ու ջուրը միացնեն, բացեն փակ ճանապարհները։