Ինչպես էլ ավարտվեն ընտրությունները՝ «Ծառուկյան» դաշինքը ՀՀ իշխանությունների հետ կոալիցիա չեն կազմի։ Այս մասին մարտի 27-ին լրագրողների հետ հանդիպման ժամանակ հայտարարել է «Ծառուկյան» դաշինքից պատգամավորության թեկնածու Վարդան Բոստանջյանը։
Նրա կարծիքով՝ ոչ մի ուժ չի առաջարկում այնպիսի արդյունավետ բարեփոխումներ, ինչպես «Ծառուկյան» դաշինքն իր 15 դրույթներով՝ սոցիալական կյանքի, պաշտպանության, գործնական ակտիվության մասին։ Նա հավելել է, որ այդ հայտարարություններին չի կարելի վերաբերվել ինչպես նախընտրական խոստումների հերթական տարափի։
«Գագիկ Ծառուկյանը մի անգամ իրավացիորեն նկատեց՝ բարեգործությունով երկիրը չեն պահի։ Այդ պատճառով էլ պետք է բարենպաստ պայմաններ ստեղծել բիզնեսի համար, որպեսզի այն զարգանա ու աշխատատեղեր ստեղծի։ Այդ հասկացությունը լավագույնս արտահայտված է մեզ մոտ», - նշել է Բոստանջյանը։
