Հայաստանի իշխանությունները չեն հասկանում, որ նվազագույն աշխատավարձի բարձրացումը թե՛ հնարավոր է, թե՛ անհրաժեշտ: Մարտի 27-ին՝ լրագրողների հետ հանդիպման ժամանակ այս մասին հայտարարեց «Ազատ դեմոկրատներ» կուսակցությունից պատգամավորության թեկնածու Հրանտ Բագրատյանը:
Կուսակցությունն առաջարկում է առաջիկա 5 տարիների ընթացքում նվազագույն աշխատավարձը ներկայիս 55 հազար դրամից բարձրացնել մինչեւ 111 հազար դրամ (ընթացիկ փոխարժեքով մոտ 230 դոլար): Դա լրացուցիչ ծախսեր չի պահանջում, եթե միաժամանակ վերացվի ստվերային զբաղվածությունը եւ լրացուցիչ եկամտահարկ հավաքվի: Բագրատյանի կարծիքով՝ դրա համար անհրաժեշտ է, որ խիստ լինեն ոչ միայն հարկային մարմինները, այլեւ համընդհանուր հարկային հայտարարագրերը՝ ոչ միայն բիզնեսի համար, այլ նաեւ քաղաքացիների: Երկրորդ՝ անհրաժեշտ է արգելել օֆշորների միջոցով հանքարդյունաբերության բիզնեսի գործարքները, որոնց բյուջեն միլիոնավոր դոլարներով է հաշվվում: «Իշխանությունները հայտարարում են՝ եթե նվազագույն աշխատավարձը բարձրացնենք, ստիպված կլինենք ինդեքսավորել նաեւ մնացած աշխատավարձերը: Սա ի՞նչ փաստարկ է: Ո՞վ է սա ասել: Օրինակ՝ ինչո՞ւ ձեր աշխատավարձը պետք է կապված լինի Գորիսի քաղաքապետի աշխատավարձի հետ: Այստեղ տրամաբանությունը ո՞րն է: Պարզապես պետք է փոխել այդ գործակիցները եւ սանդղակը: Իսկ իշխանությունները սա չեն հասկանում»,- նշեց Հրանտ Բագրատգյանը: