Հայաստանի բնակչության 72%–ը դրական է գնահատում ՀՀ վարչապետ Կարեն Կարապետյանի կառավարության աշխատանքը։ Այս մասին այսօր՝ մարտի 28–ին, լրագրողների հետ հանդիպմանը ասել է Հասարակական կարծիքի հետազոտության համառուսաստանյան կենտրոնի (ВЦИОМ) ղեկավար Վալերի Ֆյոդորովը՝ ներկայացնելով Հայաստանում նախընտրական քարոզչության ժամանակ կենտրոնի իրականացրած նոր հարցումների արդյունքները։
Հարցման արդյունքները ցույց են տալիս, որ չնայած բնակչությունը դժգոհ է երկրում ստեղծված վիճակից և տնտեսական զարգացման տեմպերից, Կարեն Կարապետյանի իմիջը դրական է, ինչն էլ ամենաշատն է ազդում ՀՀԿ վարկանիշի վրա։
Ըստ Ֆյոդորովի՝ հարցվածների մեծ մասն ընտրություն կատարելիս կողմնորոշվում է թեկնածուների անձնական հատկանիշներով, իսկ Կարեն Կարապետյանին ընկալում են որպես երիտասարդ ռեֆորմատոր։
Հարցումն անցկացվել է «Շանթ» հեռուստաընկերության պատվերով մարտի 17-24-ը Հայաստանի ամբողջ տարածքում։ Հարցմանը մասնակցել է 1600 քաղաքացի: