Հայաստանի ԿԸՀ-ն մարտի 28-ի արտահերթ նիստի ժամանակ մերժել է «Իրազեկ քաղաքացիների միավորում» ՀԿ-ի պահանջը՝ ՀՀԿ ներկայացուցիչների կողմից ուսանողների անվճար փոխադրում իրականացնելու կապակցությամբ վարչական վարույթ բացելու մասին։
NEWS.am-ի թղթակիցը հայտնել է, որ «Իրազեկ քաղաքացիների միավորում» ՀԿ-ն ներկայացրել է դիմում այն մասին, որ ՀՀԿ-ն անվճար ծառայություններ է մատուցում ։ Մասնավորապես դիմումում նշված է, որ մարտի 20-ին ՀՀԿ-ն ( կամ ՀՀԿ-ի անունից) իրականացվել է ուսանող ուղեւորների անվճար փոխադրում։ Դիմումի մեջ առաջարկվում է այդ կապակցությամբ վարչական վարույթ բացել։
Որպես կայացված որոշման հիմնավորում՝ ԿԸՀ նախագահ Տիգրան Մուկուչյանը շեշտել է «Դիմումը ներկայացրել է հասարակական կազմակերպություն։ Հասարակական կազմակերպության որեւէ իրավունք ոչ միայն չի խախտվել, այլեւ չի արծարծվել»
Սակայն, ըստ Մուկուչյանի, «Իրազեկ քաղաքացիների միավորում» ՀԿ-ի ներկայացրած փաստացի հանգամանքների հիման վրա ԿԸՀ-ն ինքնուրույն է բացել վարչական վարույթ։ «Մենք դիմել ենք ՀՀԿ-ին, ստացել բացատրություններ այն մասին, որ ՀՀԿ առանձին անդամներ մշտապես կազմակերպել են ուսանողների անվճար փոխադրումներ, անկախ ընտրություններից»,- նշել է Մուկուչյանը։ Սակայն ընտրությունների կապակցությամբ, շարունակել է նա, փոխադրումները կասեցվել են։ «Կուսակցությունը բացահայտել է փոխադրումների առանձին դեպքերը ու պահանջել անհապաղ դադարեցնել դրանք, ինչն էլ արվել է։ Հետեւաբար, ԿԸՀ-ն որոշում է դադարեցնել բացված վարչական վարույթը»,- ամփոփել է Տիգրան Մուկուչյանը։