Հայաստանի ԿԸՀ-ին ներկայացված պահանջները , որոնք պարունակում են «Օհանյան-Րաֆֆի- Օսկանյան» ու «Ելք» դաշինքների դիմումները,  նույնն են, բայց դրանց հիմքերն են տարբեր։ Այս մասին մարտի 28-ին լրագրողների հետ զրույցի ժամանակ ասել է ԿԸՀ նախագահ Տիգրան Մուկուչյանը ԿԸՀ արտահերթ նիստից հետո։

Նրա խոսքով, «Ելք» դաշինքը դիմումը ներկայացրել է այսօր, մի քանի ժամ առաջ։ «Մենք հասցրել ենք ուսումնասիրել ու աչքի անցկացնել դիմումը , բայց բնականաբար քանի որ շատ փաստաթղթեր են ներկայացվել, այդ դիմումը կքննարկվի հետագայում։ ԿԸՀ-ն կլսի դաշինքի ներկայացուցչին ու կկայացնի համապատասխան որոշում»,- ասել է Տիգրան Մուկուչյանը։

Նշենք, որ «Ելք» դաշինքից պատգամավորության թեկնածուներ Արտակ Զեյնալյանը, Նիկոլայ Բաղդասարյանը ԿԸՀ մարտի 28- ի արտահերթ նիստի ժամանակ խնդրել էին «Օհանյան- Րաֆֆի- Օսկանյան» դաշինքի դիմումի քննարկման գործընթացում իրենց ներառել որպես երրորդ կողմ, բայց ԿԸՀ-ն քվեարկության միջոցով մերժել էր այդ առաջարկը։

Ավելի վաղ NEWS.am–ը հայտնել էր, որ ԿԸՀ-ն մարտի 28-ի արտահերթ նիստի ժամանակ մերժել էր «Օհանյան- Րաֆֆի- Օսկանյան» դաշինքի պահանջը՝ ապրիլի 2-ի խորհրդարանական ընտրություններին մասնակցության համար ՀՀԿ գրանցումն ուժը կորցրած ճանաչելու մասին։