Առանց փոխզիջումների Արցախի հարցն անհնար է լուծել, փոխզիջումներ պետք են, բայց դրանց մասին պետք է խոսել այն ժամանակ, երբ Ադրբեջանը պատրաստ լինի գնալ փոխզիջումների: Այս մասին, այսօր՝ մարտի 29-ին, լրագրողների հետ հանդիպման ժամանակ նշել է ՀՀԿ մամուլի խոսնակ Էդուրադ Շարմազանովը:
Դիտարկմանը, որ նախօրեին ՀՀ առաջին նախագահ Լեւոն Տեր-Պետրոսյանը հայտարարել է, որ իշխանությունները պատրաստ են լուծել Արցախի խնդիրը Մադրիդյան սկզբունքների հիման վրա, ինչը ենթադրում է տարածքների վերադարձ, եւ ինքը սատարում է այդ հարցում իշխանություններին, Շարմազանովն արձագանքեց. «Իշխանության կարծիքը Արցախի հարցի վերաբերյալ շատ պարզ է, որը չի փոխվել. Նախ, Արցախի վերջնական կարգավիճակը բացառապես Արցախի ժողովրդի որոշելիքն է: Մենք սատարելու ենք այս գործում Արցախի քաղաքացիներին եւ հետքայլ այս կետով անհնար է: Երկրորդ, մենք սատարել եւ սատարելու ենք ԵԱՀԿ Մինսկի խմբի համանախագահության խաղաղության հասնելու ջանքերին՝ երեք սկզբունքների հիման վրա լուծելու այս խնդիրը: Երրորդ, մենք ամրացնելու ենք մեր առաջնագիծը, հզորացնելու ենք անվտանգությունը, միաժամանակ քայլեր ենք ձեռնարկելու, որ Արցախը վերադառնա բանակցային սեղան: Առանց Արցախի մասնակցության անհնար է խնդրի լուծումը»:
Անդրադառնալով Մադրիդյան սկզբունքներին, ՀՀԿ մամուլի խոսնակը նշեց, որ այդ սկզբունքները շրջանառության մեջ են մտել 2007-ին, իսկ 2011-ին մի փոքր մոդիֆիկացվելով, դարձել Կազանյան փաստաթուղթ. «Հայկական կողմը պատրաստ էր ստորագրելու, դա մերժեց Ադրբեջանը: Իսկ մերժում է այն ուժը, որին ձեռնտու չէ այդ փաստաթուղթը: Մադրիդյան կամ կազանյան փաստաթղթերը մեր երազանքի փաստաթղթերը չեն, բայց դրանք հիմք են հասնելու մեր նպատակներին: Մեր նպատակն է հասնել 1988 թվականի արդար դատի իրականացմանը: Իսկ 1988-ին հիշում ենք, թե ինչ էին ցանկանում մեր հայրերը Երեւանում եւ Ստեփանակերտում: Բնականաբար փոխզիջումներ պետք են, բայց դրանց մասին պետք է խոսենք այն ժամանակ, երբ Ադրբեջանը պատրաստ լինի գնալ փոխզիջումների»:
Շարմազանովը նկատեց, որ Արցախի հարցում ՀՀ առաջին նախագահի կարծիքը չի փոխվել. «Ինձ համար զարմանալի է այն մարդկանց կարծիքը, որոնք 2008-ին ծափահարում էին Տեր-Պետրոսյանին, այսօր քննադատում են»:
