Քվեարկեցի հանուն մեր պետության: Այս մասին այսօր՝ ապրիլի 2-ին, թիվ 6/01 ընտրական տեղամասում ԱԺ ընտրությունների քվեարկությանը մասնակցելուց հետո լրագրողների հետ զրույցում նշել է ԱԺ նախագահ Գալուստ Սահակյանը:
ԱԺ նախագահը քվեարկության եկել էր ընտանիքի անդամների հետ: Նրա քվեարկությունը բավական երկար տեւեց, քանի որ մատնահետքը ճանաչող սարքը ոչ մի կերպ չէր ճանաչում Գալուստ Սահակյանի մատնահետքը: Մի քանի անգամ աջ եւ ձախ ձեռքերի ցուցամատերը փորձարկելուց հետո վերջապես սարքը ճանաչեց Գալուստ Սահակյանի մատնահետքը:
Մինչ ԱԺ նախագահը երկար հերթ էր կանգնել քվեաթերթիկ ստանալու բաժնում, նա այդ ընթացքում աշխատակիցներից հետաքրքրվում էր, թե ինչ հերթականությամբ եւ ինչպես պետք է կատարի ընտրությունը:
Արդեն քվեախցում ընտրությունը կատարելուց հետո Գալուստ Սահակյանը լրագրողների հետ զրույցում նշեց.
«Այն, ինչի մասին մտածել էինք ժամանակին, այսօր այնպես է արված, որ մինչեւ վերջ կանոնակարգը պահպանվում է: Բարդություններ չկային եւ չեմ կարծում, որ կլինեին, որովհետեւ սա ոչ միայն մենք էինք կազմել, այլ ամբողջ ընդդիմության հետ միասին կարողացել ենք այնպես անել, որ բոլոր հանգամանքները ժամանակին ներկայացնել եւ ներգրավվել օրեսգրքի մեջ:
Այսօր ես քվեարկեցի հանուն պետության` մեր պետության: Հայ ժողովրդի համար ամենակարեւոր գործոնը պետությունն է: Մեր ժողովուրդը պետք է իմանա, որ բավականին երկար ժամանակ ինքը պետականություն չի ունեցել: Այսօր այն հայը, որն այդ ճանապարհով է գնում, կարծում եմ նաեւ մտածում է իր երեխաների եւ իր ապագայի մասին: Ինչ վերաբերում է ընտրությունների արդյունքներին, կարծում եմ` ոչ թե մի քանի մարդիկ են մտածում երկրի, ժողովրդի մասին, այլ ժողովրդից սկսած՝ Ազգային Ժողով, նաեւ Կառավարություն, միասնական կարողանում են ինչ-որ բան մտածել: Մասնավորապես` այս անգամ շատ կարեւոր է, որ ժողովուրդը ցանկացած դեպքում կարող է իր առաջարկությունները ներկայացնել»,- ասաց Գալուստ Սահակյանը:
