Մենք ապրիլին դարձանք ավելի ուժեղ, որովհետեւ ապրիլին վերհիշեցինք միասնական լինելու խորհուրդը։ Այդ մասին լրագրողների հետ զրույցում ասել է Հայաստանի պաշտպանության նախարար Վիգեն Սարգսյանը, որն այսօր՝ ապրիլի 2-ին Գյումրիում այցելել է «Ազատամարտիկների» պանթեոն եւ հարգանքի տուրք մատուցել ապրիլյան պատերազմում զոհվածների հիշատակին։
Վիգեն Սարգսյանին ուղեկցել են Շիրակի մարզպետ Հովսեփ Սիմոնյանը, Գյումրիի քաղաքապետ Սամվել Բալասանյանը, նախագահի խորհրդական Ֆելիքս Ցոլակյանը, ՀՀԿ-ական թեկնածուներ Սամվել Նիկոյանը, Մարտուն Սարգսյանը։
«Մենք բոլորս ոգեկոչում ենք հերոս տղաներին, բոլոր նրանց, ովքեր իրենց կյանքը կապեցին մեր երկրի ազատ ու անվտանգ հիմքը դնելու հետ՝ Արցախյան ազատամարտում, հետո ապրիլյան քառօրյայի օրերին»,- ասելէ Վիգեն Սարգսյանն ու հավելել. «Ապրիլի ամենամեծ դասը եղավ մեր միասնականությունը, մեր ժողովրդի համախմբվածությունը, մեր կամավորականների՝ մեր զինված ուժերի կողքը հստակ կանգնելու դրսեւորումը, սփյուռքի մեր եղբայրների ու քույրերի անվերապահ աջակցությունը, մեր երիտասարդության ինքնաբուխ եւ շատ ազդեցիկ արձագանքը: Մենք ապրիլին դարձանք ավելի ուժեղ, որովհետեւ ապրիլին վերհիշեցինք միասնական լինելու խորհուրդը»։
