Երեւանի պետական համալսարանի ուսանողները այսօր` ապրիլի 4-ին, երթով շարժվեցին Եռաբլուր պանթեոն` հարգանքի տուրք մատուցելու ապրիլյան պատերազմում զոհվածների հիշատակին: Երթը կազմակերպվել էր ԵՊՀ-ի Մարտական պատրաստության ակումբի կողմից:
«Այս երթով մենք ուզում ենք մեր հարգանքի տուրքը մատուցել ապրիլյան պատերազմում զոհված մեր տղաներին, որոնք իրենց կյանքը տվեցին հանուն մեր հայրենիքի խաղաղության համար: Ծանոթներ ունեմ, որոնք մասնակցել են ապրիլյան պատերազմին: Նրանք սկզբում ոչինչ չէին պատմում, մեկուսացած էին, սակայն հետո պատմեցին, թե որքան դժվար էր սահմանին, բայց զարմանալին այն է, որ նրանցից յուրաքանչյուրը էլի պատրաստ էր գնալ ու կանգնել սահմանին»,-ասաց ԵՊՀ Ժուռնալիստիկայի ֆակուլտետի ուսանողուհի Մարիամ Ավետիսյանը:
«Եռաբլուր» զինվորական պանթեոնում, մոմավառությունից հետո, ուսանողները մի քանի րոպե լռությամբ հարգեցին 2016 թվականի ապրիլին Արցախում զոհված զինվորների հիշատակը: